कच्चं तेल स्वस्त, पण दरवाढ मस्त!

कच्चं तेल स्वस्त, पण दरवाढ मस्त!
राष्ट्रवादी युवक काँग्रेसचे आकाशवाणी चौकात तीव्र रस्ता रोको आंदोलन

जळगाव, प्रतिनिधी :
आंतरराष्ट्रीय बाजारात कच्च्या तेलाच्या किमती गेल्या चार वर्षांतील नीचांकी पातळीवर असतानाही, केंद्र सरकारने पेट्रोल आणि डिझेलच्या किमतीत कोणतीही कपात न करता जनतेवर महागाईचा बोजा लादल्याचा आरोप करत राष्ट्रवादी युवक काँग्रेस (शरदचंद्र पवार गट) तर्फे आकाशवाणी चौकात तीव्र रस्ता रोको आंदोलन करण्यात आले.

या आंदोलनाचे नेतृत्व युवक जिल्हाध्यक्ष उमेश पाटील आणि शहर जिल्हाध्यक्ष रिकू चौधरी यांनी केले. यावेळी कार्यकर्त्यांनी केंद्र सरकारच्या महागाईविरोधी धोरणांचा निषेध करत जोरदार घोषणाबाजी केली.
“कच्चं तेल स्वस्त, पण दरवाढ मस्त – हेच का अच्छे दिन?”,
“पेट्रोलवर नफा, जनतेवर फटका – सरकारची धोरणं भटका!”,
“नफा कंपन्यांना, महागाई जनतेला – हेच का ‘सबका साथ’?”अशा घोषणांनी परिसर दणाणून गेला.

सध्या कच्च्या तेलाची किंमत प्रति बॅरल ६५.४१ डॉलर इतकी आहे, जी एप्रिल २०२१ नंतरची सर्वात नीचांकी किंमत आहे. तरीही सरकार इंधनदर कपात करत नाही. रेटिंग एजन्सीच्या अहवालानुसार तेल कंपन्यांना सध्या पेट्रोलवर १५-१६ रुपये, तर डिझेलवर ६.१२ रुपये प्रति लिटर नफा मिळत आहे. ही परिस्थिती असूनही सरकार पेट्रोल-डिझेल दरवाढ कायम ठेवून नागरिकांची लूट करत असल्याचा आरोप आंदोलकांनी केला.

आंदोलनात राष्ट्रवादी काँग्रेसचे महानगर अध्यक्ष अशोक लाडवंजारी, डॉ. संग्रामसिंह सूर्यवंशी, सुनील माळी, ओबीसी सेल जिल्हाध्यक्ष अशोक पाटील, अल्पसंख्यांक जिल्हाध्यक्ष मजहर पठाण, माजी नगरसेवक राजू मोरे, जिल्हा उपाध्यक्ष किरण राजपूत, डॉक्टर सेल महानगर अध्यक्ष डॉ. राहुल उदासी, सरचिटणीस रहीम तडवी, आकाश हिवाळे, चेतन पवार, साहिल पटेल, रफीक पटेल, योगेश साळी, संजय चव्हाण, मयूर पाटील, आबिद खान, अरबाज पटेल यांचा सक्रिय सहभाग होता.

केंद्र सरकारने पेट्रोल-डिझेलच्या वाढत्या दरांचा पुनर्विचार करून, इंधनदरात तात्काळ कपात करावी, अशी ठाम मागणी या आंदोलनाच्या माध्यमातून करण्यात आली.