जळगावात राजकीय भूकंप! शरद पवार गटाला धक्का, दिग्गज नेते अजितदादांच्या गटात

जळगावात राजकीय भूकंप! शरद पवार गटाला धक्का, दिग्गज नेते अजितदादांच्या गटात

डॉ. सतीशअण्णा पाटील, गुलाबराव देवकर,  कैलास  पाटील, दिलीप वाघ, दिलीप सोनवणे यांचा प्रवेश 

मुंबई | प्रतिनिधी – जळगाव जिल्ह्यातील राजकारणात खळबळ उडवणारी घडामोड! राष्ट्रवादी काँग्रेस – शरदचंद्र पवार गटाला मोठा फटका बसला असून, पक्षातील दिग्गज नेते, पाच माजी आमदार आणि शेकडो समर्थकांनी अजित पवार यांच्या नेतृत्वाखालील राष्ट्रवादी काँग्रेसमध्ये जाहीर प्रवेश केला. मुंबईत पार पडलेल्या भव्य सोहळ्यात या पक्षांतराने जळगावच्या राजकीय समीकरणांना नवं वळण मिळालं आहे.

विधानसभा निवडणुकीत महाविकास आघाडीला जळगावात एकही जागा मिळाली नव्हती. यामुळे शरद पवार गटात अस्वस्थता आणि अंतर्गत कलह वाढला होता. याच वेळी अनेक नेत्यांनी पक्ष सोडण्याचा निर्णय घेतला. मुंबईतील भव्य कार्यक्रमात माजी मंत्री डॉ. सतीशअण्णा पाटील, गुलाबराव देवकर, माजी आमदार कैलास गोरख पाटील, दिलीप वाघ, दिलीप सोनवणे, अमळनेर बाजार समितीच्या माजी सभापती तिलोत्तमा पाटील आणि शरद पवार गटाचे युवक जिल्हाध्यक्ष उमेश पाटील यांनी अजित पवार यांच्या उपस्थितीत राष्ट्रवादीत प्रवेश केला. उपमुख्यमंत्री अजितदादा पवार आणि प्रदेशाध्यक्ष खासदार सुनील तटकरे यांनी या नेत्यांचं स्वागत केलं.

उत्साहपूर्ण वातावरण, जोरदार घोषणाबाजी
या सोहळ्याला आमदार अनिल पाटील, जिल्हाध्यक्ष संजय पवार, महानगराध्यक्ष अभिषेक पाटील, युवक जिल्हाध्यक्ष रवींद्र नाना पाटील यांच्यासह शेकडो कार्यकर्ते उपस्थित होते. पक्षप्रवेशानंतर जोरदार घोषणाबाजीने वातावरण उत्साहाने भारलं.

शरद पवार गटाला मोठा धक्का
या घडामोडींमुळे शरद पवार यांच्या गटाची ताकद लक्षणीयरीत्या कमी झाली आहे. माजी मंत्री एकनाथ खडसे, माजी विधानसभा अध्यक्ष अरुण गुजराथी, माजी खासदार ईश्वर जैन, महिला प्रदेशाध्यक्षा रोहिणी खडसे आणि काही मोजके नेते वगळता बहुतांश दिग्गजांनी अजित पवार गटाची वाट धरली आहे.

स्थानिक निवडणुकांवर परिणाम
स्थानिक स्वराज्य संस्थांच्या निवडणुकीच्या पार्श्वभूमीवर ही घडामोड शरद पवार गटासाठी मोठं आव्हान ठरणार आहे. जळगावच्या राजकारणात आता अजित पवार गटाचं वर्चस्व वाढण्याची शक्यता राजकीय जाणकार व्यक्त करत आहेत.