पंतप्रधान मोदी आणि गृहमंत्री शहा यांच्याकडून खासदार स्मिता वाघ यांना वाढदिवसाच्या खास शुभेच्छा

पंतप्रधान मोदी आणि गृहमंत्री शहा यांच्याकडून खासदार स्मिता वाघ यांना वाढदिवसाच्या खास शुभेच्छा

स्मिता वाघ यांच्या सामाजिक आणि राजकीय क्षेत्रातील कार्याचे पंतप्रधानांकडून कौतुक 

नवी दिल्ली,  पंतप्रधान नरेंद्र मोदी आणि केंद्रीय गृहमंत्री अमित शहा यांनी नवी दिल्लीत खासदार स्मिता वाघ यांना त्यांच्या वाढदिवसानिमित्त प्रत्यक्ष भेटून शुभेच्छा दिल्या आणि शुभाशीर्वाद प्रदान केले. या खास प्रसंगी स्मिता वाघ यांच्यासह त्यांचा संपूर्ण परिवार उपस्थित होता, ज्यामुळे हा क्षण आणखी संस्मरणीय ठरला.

पंतप्रधान नरेंद्र मोदी यांनी स्मिता वाघ यांच्या सामाजिक आणि राजकीय क्षेत्रातील कार्याचे तोंडभरून कौतुक केले. “स्मिता वाघ यांनी जनसेवेसाठी स्वतःला वाहून घेतले आहे. त्यांचे योगदान कौतुकास्पद असून, पुढील वाटचालीत त्यांना भरभरून यश आणि उत्तम आरोग्य लाभो,” अशा भावना त्यांनी व्यक्त केल्या. त्यांच्या या शब्दांनी उपस्थितांवर सकारात्मक प्रभाव पाडला.

केंद्रीय गृहमंत्री अमित शहा यांनीही स्मिता वाघ यांच्या कार्यशैलीवर प्रकाश टाकला. “स्मिता वाघ यांची जनसंपर्कातील हातोटी आणि कार्य करण्याची ऊर्जा वाखाणण्याजोगी आहे. त्यांना राजकीय क्षेत्रात यशाची नवी उंची गाठता येईल,” अशा शुभेच्छा देत त्यांनी वाघ यांच्या कर्तृत्वाला सलाम केला.

या सन्मानाने भारावलेल्या स्मिता वाघ यांनी पंतप्रधान आणि गृहमंत्री यांचे आभार मानले. “देशातील दोन दिग्गज नेत्यांकडून मिळालेल्या या शुभेच्छा माझ्यासाठी प्रेरणादायी आहेत. यामुळे जनसेवेच्या कार्यात अधिक जोमाने योगदान देण्याची प्रेरणा मला मिळाली आहे,” असे त्यांनी सांगितले. या भेटीमुळे त्यांचा परिवारही अभिमानाने उंचावला असून, हा क्षण त्यांच्यासाठी अविस्मरणीय ठरला आहे.