अज्ञात वाहनाच्या धडकेत खडकी बुद्रुक येथील तरुणाचा मृत्यू

अज्ञात वाहनाच्या धडकेत खडकी बुद्रुक येथील तरुणाचा मृत्यू

चाळीसगाव : येथील रेल्वे उड्डाणपुलावर स्कूटरला अज्ञात वाहनाने दिलेल्या जोरदार धडकेत खडकी बुद्रुक येथील तरुणाचा दुर्दैवी मृत्यू झाल्याची घटना घडली. या प्रकरणी चाळीसगाव शहर पोलीस ठाण्यात नोंद करण्यात आली असून परिसरात हळहळ व्यक्त होत आहे.
मिळालेल्या माहितीनुसार, खडकी बुद्रुक येथील रहिवासी व सामाजिक कार्यकर्ते सचिन अशोक ठुबे (वय ३७) हे ३ मार्च रोजी रात्री सुमारे ११.३० वाजता त्यांच्या पांढऱ्या रंगाच्या होंडा अॅक्टिवा (एमएच-१९, बीएस ८२४०) या दुचाकीवरून घरी परतत होते. दरम्यान, चाळीसगाव शहरातील रेल्वे उड्डाणपुलावर त्यांच्या दुचाकीला अज्ञात वाहनाने जोरदार धडक दिली. या भीषण धडकेत सचिन ठुबे यांचा जागीच मृत्यू झाला.

अपघातानंतर धडक देणारा वाहनचालक वाहनासह घटनास्थळावरून पसार झाला. या घटनेची माहिती मिळताच पोलिसांनी घटनास्थळी धाव घेत पंचनामा केला. ग्रामीण रुग्णालयाच्या वैद्यकीय अधिकाऱ्यांच्या माहितीवरून चाळीसगाव शहर पोलीस ठाण्यात अकस्मात मृत्यूची नोंद करण्यात आली आहे.

दरम्यान, अपघात घडलेल्या परिसरातील सीसीटीव्ही फुटेजच्या आधारे अज्ञात वाहनाचा शोध घेण्याचे काम पोलिसांकडून सुरू आहे. सचिन ठुबे हे सामाजिक कार्यात सक्रिय असल्याने त्यांच्या आकस्मिक निधनामुळे खडकी बुद्रुकसह परिसरात हळहळ व्यक्त होत आहे.