अज्ञात वाहनाच्या धडकेत दोन तरुणांचा जागीच मृत्यू

अज्ञात वाहनाच्या धडकेत दोन तरुणांचा जागीच मृत्यू

मामलदे फाट्याजवळ घडली दुर्दैवी घटना

चोपडा प्रतिनिधी |

चोपडा तालुक्यातील मामलदे फाट्याजवळ झालेल्या भीषण अपघातात दोन तरुण मित्रांचा जागीच मृत्यू झाला. गुरुवारी सायंकाळी साडेसहाच्या सुमारास घडलेल्या या घटनेने परिसरात शोककळा पसरली आहे. मृतांमध्ये अमोल ज्ञानेश्वर पाटील (२५) आणि पृथ्वीराज चंद्रकांत पाटील (२३) या दोघांचा समावेश आहे.

मिळालेल्या माहितीनुसार, दोघेही चोपडा शहरातील आपली कामे आटोपून मामलदे गावाकडे दुचाकीवरून परतत होते. दरम्यान, मामलदे फाट्याजवळ समोरून भरधाव वेगात येणाऱ्या एका अज्ञात चारचाकी वाहनाने त्यांच्या दुचाकीला जोरदार कट दिला. अचानक झालेल्या या धडकेत दुचाकीवरील नियंत्रण सुटले आणि ती थेट समोरील वाहनावर आदळली. अपघात एवढा भीषण होता की, दोघांचाही जागीच मृत्यू झाला.

अपघातानंतर नातेवाईकांनी त्यांना तत्काळ चोपडा उपजिल्हा रुग्णालयात नेले. मात्र डॉ. स्वप्ना पाटील यांनी तपासानंतर दोघांनाही मृत घोषित केले. या घटनेनंतर रुग्णालय परिसरात हृदयद्रावक आक्रोश पसरला होता.

मृत पृथ्वीराज पाटील याचे सुरत येथे कापडाचे दुकान होते. दसऱ्यानिमित्त तो मामलदे येथे घरी आला होता. नुकतीच त्याने नवीन स्पोर्ट्स बाईक खरेदी केली होती. तर अमोल पाटील हा बियाणे कंपनीत कार्यरत होता आणि त्याचे लग्न ठरले होते. साखरपुड्याची तयारी सुरू असताना झालेल्या या अपघाताने कुटुंबावर दु:खाचा डोंगर कोसळला.

दोघेही एकुलते एक असल्याने गावात हळहळ व्यक्त होत आहे. पृथ्वीराज हा सोशल मीडियावर रील्स स्टार म्हणूनही परिचित होता. त्याच्या पश्चात आई-वडील व बहिण असा परिवार आहे.

अपघाताची माहिती मिळताच आमदार प्रा. चंद्रकांत सोनवणे यांनी रुग्णालयात भेट देऊन नातेवाईकांचे सांत्वन केले आणि शक्य ती मदत करण्याचे आश्वासन दिले. यावेळी माजी विधानसभा अध्यक्ष अरुणभाई गुजराथी, माजी आमदार कैलास पाटील, सभापती नरेंद्र पाटील, शशिकांत पाटील, देवेंद्र पाटील व शुभम चौधरी आदी मान्यवर उपस्थित होते.

मयत दोघांवर १७ ऑक्टोबर रोजी मामलदे येथे अंत्यसंस्कार करण्यात येणार आहेत. या दुर्दैवी घटनेने चोपडा व मामलदे परिसरात शोककळा पसरली असून, तरुणांच्या अकाली मृत्यूने सर्वत्र हळहळ व्यक्त होत आहे.