अमली पदार्थांविरोधात पोलिसांची धडक कारवाई; ६३ किलो गांजासह सहा जण अटकेत

अमली पदार्थांविरोधात पोलिसांची धडक कारवाई; ६३ किलो गांजासह सहा जण अटकेत

दोन आलिशान कार जप्त; २२ लाखांहून अधिक किमतीचा मुद्देमाल हस्तगत

जळगाव (प्रतिनिधी) – जिल्ह्यात अमली पदार्थ तस्करीविरोधात पोलिसांनी उघडलेल्या विशेष मोहिमेला मोठे यश मिळाले असून स्थानिक गुन्हे शाखा आणि पहूर पोलीस ठाण्याच्या पथकाने संयुक्त कारवाई करत तब्बल ६३ किलो ७१० ग्रॅम गांजा जप्त केला आहे. या धाडसी कारवाईत दोन आलिशान कारसह एकूण २२ लाख ७४ हजार २०० रुपयांचा मुद्देमाल हस्तगत करण्यात आला असून सहा आरोपींना अटक करण्यात आली आहे.

स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना दि. २ मार्च रोजी गोपनीय माहिती मिळाली होती की, एमएच-०४-डीजे-२०४२ क्रमांकाच्या इनोव्हा कारमधून जळगावकडून पहूरच्या दिशेने अमली पदार्थांची वाहतूक होत आहे. मिळालेल्या माहितीच्या आधारे पोलिसांनी वाकोद गावाच्या पुढे सापळा रचत संशयित वाहनाचा पाठलाग केला आणि कार ताब्यात घेतली. झडतीदरम्यान कारमध्ये मोठ्या प्रमाणात गांजा आढळून आला. जप्त करण्यात आलेल्या गांजाचे वजन ६३ किलो ७१० ग्रॅम असून त्याची बाजारभावानुसार किंमत १२ लाख ७४ हजार २०० रुपये इतकी आहे.

या प्रकरणात मुंबई आणि धुळे येथील एकूण सहा जणांना अटक करण्यात आली आहे. सागर संजय इंगवले (रा. विचुंबे गाव, नवी मुंबई), इरफान अकरम शेख (रा. गोरेगाव, मुंबई), अमन ताज खान (रा. वर्सोवा, मुंबई), नईम शेख याकुब (रा. माणिकनगर, धुळे), आबीद खान मेहमुद खान (रा. जाममोहल्ला, धुळे) आणि तोहसिफ खान रसूल खान (रा. १०० फुटी रोड, धुळे) अशी अटक करण्यात आलेल्या आरोपींची नावे आहेत. प्राथमिक तपासात धुळे येथील आरोपींनी हा गांजा खामगाव येथून खरेदी करून विक्रीसाठी वाहतूक केल्याचे निष्पन्न झाले आहे.

ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी बापू रोहम यांच्या मार्गदर्शनाखाली पार पडली. स्थानिक गुन्हे शाखेचे वरिष्ठ पोलीस निरीक्षक राहुल गायकवाड, सपोनि प्रमोद कठोरे यांच्यासह पथकातील अधिकारी व कर्मचाऱ्यांनी ही यशस्वी मोहीम राबवली.

याप्रकरणी पहूर पोलीस ठाणे येथे NDPS कायद्याच्या विविध कलमान्वये गुन्हा दाखल करण्यात आला असून पुढील तपास पोलीस उपनिरीक्षक गणेश सुस्ते करीत आहेत. जिल्ह्यातील अमली पदार्थांच्या साखळीचा छडा लावण्यासाठी पोलिसांनी तपासाची व्याप्ती वाढवली आहे.