अमळनेरमध्ये दोन पोलीस कर्मचारी व पंटर लाच घेताना ACBच्या जाळ्यात

अमळनेरमध्ये दोन पोलीस कर्मचारी व पंटर लाच घेताना ACBच्या जाळ्यात

अमळनेर | काँप्रेसरच्या साहाय्याने गॅस भरण्याचा व्यवसाय सुरू ठेवण्यासाठी दरमहा पंधरा हजार रुपये हप्ता मागणाऱ्या दोन पोलीस कर्मचाऱ्यांना आणि त्यांच्या पंटरला लाचलुचपत प्रतिबंधक खात्याच्या (ACB) पथकाने रंगेहात पकडले. या कारवाईने परिसरात खळबळ उडाली आहे.

धुळे रोडवरील एका व्यावसायिकाने दिलेल्या तक्रारीनुसार, अमळनेर पोलीस स्थानकातील अमोल राजेंद्र पाटील आणि जितेंद्र रमणलाल निकुंभे यांनी दरमहा पंधरा हजार रुपयांचा हप्ता न दिल्यास गुन्हा दाखल करण्याची धमकी दिली होती. चर्चेनंतर दरमहा बारा हजारांवर तडजोड झाली आणि पहिला हप्ता देण्यासाठी ठरले.

यावर ACB पथकाने सापळा रचून पाचपावली मंदिराजवळील पानटपरीवर व्यावसायिकाकडून बारा हजार रुपये स्वीकारताना पोलीस कर्मचारी अमोल पाटील, जितेंद्र निकुंभे आणि पंटर उमेश भटू बारी यांना रंगेहात पकडले.

या घटनेनंतर परिसरात तणाव निर्माण झाला असून, अमळनेर पोलीस स्थानकात तिघांविरुद्ध गुन्हा दाखल करून तपास सुरू आहे.