अमळनेरमध्ये २ गावठी पिस्तूलसह ६ जिवंत काडतुसे जप्त; दोन तरुण अटकेत

अमळनेरमध्ये २ गावठी पिस्तूलसह ६ जिवंत काडतुसे जप्त; दोन तरुण अटकेत

अमळनेर: अमळनेर ते चोपडा रस्त्यावर पोलिसांनी केलेल्या धडक कारवाईत दोन तरुणांकडून दोन गावठी पिस्तूल आणि सहा जिवंत काडतुसे जप्त करण्यात आली आहेत. गुरुवारी (२८ ऑगस्ट) रात्री साडेदहाच्या सुमारास ही कारवाई करण्यात आली असून, पोलिसांनी दोन्ही आरोपींना अटक केली आहे.

अमळनेर पोलीस स्टेशनचे निरीक्षक दत्तात्रय निकम यांना गोपनीय माहिती मिळाली होती. त्यानुसार त्यांनी अमळनेर शहरातील चोपडा रस्त्यावर, आसाराम बापू आश्रमासमोर सापळा रचला. रात्री साडेदहाच्या सुमारास संशयित आरोपी विशाल भैय्या सोनवणे (वय १८, रा. ढेकुसिम, ता. अमळनेर) आणि गोपाल भीमा भिल (वय ३०, रा. सत्रासेन, ता. चोपडा) यांना ताब्यात घेण्यात आले.

पोलिसांनी त्यांची अंगझडती घेतली असता, त्यांच्याकडे कोणत्याही प्रकारचा परवाना नसताना दोन गावठी पिस्तूल आणि सहा जिवंत काडतुसे आढळून आली. यानंतर शुक्रवारी मध्यरात्री ३ वाजता त्यांना अटक करण्यात आली. या कारवाईत पोलिसांनी एकूण १ लाख ६६ हजार रुपयांचा मुद्देमाल जप्त केला आहे.

ही कारवाई पोलीस निरीक्षक दत्तात्रय निकम यांच्या मार्गदर्शनाखाली करण्यात आली. या प्रकरणाचा पुढील तपास उपनिरीक्षक नामदेव बोरकर करत आहेत.