अमळनेर पोलिसांची कारवाई : मध्य प्रदेशातून चोरीच्या तीन चारचाकी वाहनांसह एक संशयित अटकेत

अमळनेर पोलिसांची कारवाई : मध्य प्रदेशातून चोरीच्या तीन चारचाकी वाहनांसह एक संशयित अटकेत

अमळनेर (प्रतिनिधी): अमळनेर शहरातील ओमसाई श्रद्धा नगर येथून चोरीस गेलेल्या चारचाकी वाहनाचा तपास करताना अमळनेर पोलिसांनी मध्य प्रदेशातील मंदसौर जिल्ह्यातून तीन चोरीच्या वाहनांचा मोठा साठा हस्तगत केला आहे. या कारवाईत एक संशयित इसम ताब्यात घेण्यात आला असून त्याच्याकडून आणखी माहिती मिळण्याची शक्यता आहे.

दि. 24 मे 2025 रोजी रात्री 10.30 ते 25 मे रोजी पहाटे 5 दरम्यान प्रविण हरिश्चंद्र ठाकूर (वय 44) यांच्या मालकीची मारुती सुझुकी डिझायर (MH18 AJ3110) गाडी त्यांच्या घरासमोरून अज्ञात चोरट्याने चोरून नेली होती. याप्रकरणी अमळनेर पोलीस ठाण्यात गुन्हा दाखल करण्यात आला होता.

तांत्रिक विश्लेषण आणि गोपनीय माहितीच्या आधारे तपास सुरु ठेवत, पोलीस अधिक्षक डॉ. महेश्वर रेड्डी, अपर पोलीस अधिक्षक कविता नेरकर आणि उपविभागीय पोलीस अधिकारी विनायक कोते यांच्या मार्गदर्शनाखाली अमळनेर पोलिसांचे पथक मध्य प्रदेशातील सीतामऊ तालुक्यातील रावती गावात पोहोचले.

तेथे संशयित राहुल पाटीदार याच्या घराजवळील गोडाऊनमध्ये धाड टाकली असता खालीलप्रमाणे वाहनं आढळून आली:

1. अंदाजे 35 लाख रुपये किंमतीची टोयोटा फॉर्च्युनर (CG10 BL6776) – चेसिस नंबर नष्ट केलेला.

2. अंदाजे 12 लाख रुपये किंमतीची हुंडई क्रेटा (MP04 Z12963) – चेसिस व इंजिन नंबर नष्ट केलेले.

3. अमळनेरमधून चोरीस गेलेली मारुती डिझायर.

पोलिसांनी सर्व वाहने ताब्यात घेऊन अमळनेर पोलीस ठाण्यात आणली असून पुढील तपास सुरु आहे. आढळलेली वाहने इतर गुन्ह्यांशी संबंधित असल्याचे निष्पन्न झाले आहे. फॉर्च्युनर नागपूर शहरातील राणाप्रताप नगर पोलीस ठाण्यातील तर हुंडई क्रेटा जळगाव तालुका पोलीस ठाण्यातील चोरी प्रकरणाशी संबंधित आहे.

ही संपूर्ण कारवाई अमळनेर पोलीस ठाण्याचे पोलीस निरीक्षक दत्तात्रय निकम, स्थानिक गुन्हे शाखेचे शरद बागल यांच्या मार्गदर्शनाखाली गुन्हे शोध पथकातील पोलीस उपनिरीक्षक मामदेव बोरकर, विनोद संदानशिव, निलेश मोरे, प्रशांत पाटील आणि उज्वल म्हस्के यांनी केली.