अमळनेर बसस्थानकात बसमध्ये चढताना महिलेच्या गळ्यातील २४ हजारांचे मंगळसूत्र लंपास

अमळनेर बसस्थानकात बसमध्ये चढताना महिलेच्या गळ्यातील २४ हजारांचे मंगळसूत्र लंपास

अमळनेर – अमळनेर बसस्थानकात बसमध्ये चढत असताना एका महिलेच्या गळ्यातील २४ हजार रुपये किंमतीचे सोन्याचे मंगळसूत्र अज्ञात चोरट्यांनी चोरून नेल्याची घटना गुरुवारी १७ जुलै रोजी सायंकाळी सव्वा पाच वाजेच्या सुमारास घडली. या प्रकरणी शुक्रवारी १८ जुलै रोजी दुपारी तीन वाजता अमळनेर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.

उदयनगर, ता. अमळनेर येथील प्रतिभा राजेश वाघ (वय ३९) या आपल्या मुलासह कामानिमित्त अमळनेर येथे आल्या होत्या. सायंकाळी सव्वा पाच वाजेच्या सुमारास काम आटोपून त्या बसस्थानकात घरी जाण्यासाठी पोहोचल्या. बसमध्ये चढत असताना गर्दीचा फायदा घेत अज्ञात चोरट्याने त्यांच्या गळ्यातील मंगळसूत्र खेचून पळ काढला.

घटनेनंतर त्यांनी बस व बसस्थानक परिसरात चोरट्याचा शोध घेतला, मात्र कुठलीही माहिती मिळाली नाही. अखेर दुसऱ्या दिवशी त्यांनी पोलीस ठाण्यात धाव घेत तक्रार दाखल केली.

या तक्रारीवरून अमळनेर पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला असून, पुढील तपास पोलीस हवालदार संतोष पवार करत आहेत.