अल्पवयीन मुलीवर काकाकडून लैंगिक अत्याचार

अल्पवयीन मुलीवर काकाकडून लैंगिक अत्याचार
भुसावळ,(प्रतिनिधी): भुसावळ शहरातील एका परिसरात हृदयद्रावक घटना उघडकीस आली असून, अल्पवयीन मुलीवर तिच्या मावशीच्या पतीने म्हणजेच काकाने लैंगिक अत्याचार केल्याचे समोर आले आहे. पोलिसांनी तातडीने कारवाई करत आरोपीला अटक केली असून, न्यायालयाने त्याला दोन दिवसांची पोलीस कोठडी सुनावली आहे. या प्रकरणाने परिसरात संतापाची लाट उसळली असून, पोलिस तपासात आणखी धक्कादायक माहिती समोर येऊ शकते.
पीडित मुलगी नाशिक येथील रहिवासी असून, ती शिक्षण घेत आहे. तिच्या पालकांमध्ये कौटुंबिक वाद सुरू असल्याने ती आईसोबत राहत होती. आई नोकरीनिमित्त व्यस्त असल्याने मुलगी कधीकधी नातेवाइकांकडे राहत असे. काही दिवसांपूर्वी ती भुसावळ येथील मावशीच्या घरी राहण्यासाठी आली होती. मात्र, मावशी कामानिमित्त बाहेरगावी गेल्याने मुलगी काकासोबत आणि एका लहान भावासोबतच घरात राहिली. दि. १६ सप्टेंबर रोजी सकाळी काकाने मुलीवर जबरदस्ती करून लैंगिक अत्याचार केला. मुलीने विरोध दर्शवला असता तिला जीवघेणी धमकी देण्यात आली. रात्री काका पुन्हा घरी परतला आणि मध्यरात्री पुन्हा तिच्यावर अत्याचार केला.
भीतीमुळे ही घटना दडवून ठेवलेली मुलगी अखेर दि. १८ सप्टेंबर रोजी प्रकृती बिघडल्याने आई आणि मावशीला फोनवर सर्व प्रकार सांगितला. दि. १९ सप्टेंबर रोजी आई व मावशी भुसावळला परत आल्या आणि मुलीला सोबत घेऊन त्या थेट बाजारपेठ पोलिस ठाण्यात पोहोचल्या. पोलिसांनी तक्रारीवरून संशयित काकाविरुद्ध लैंगिक अत्याचार, धमकी आणि इतर कठोर कलमांतर्गत गुन्हा दाखल केला. पोलिसांनी तात्काळ आरोपीला अटक केली आणि न्यायालयासमोर हजर केले. न्यायालयाने या प्रकरणाची गंभीरता पाहता आरोपीला दोन दिवसांची पोलीस कोठडी सुनावली, जेणेकरून तपास अधिक गतीने होईल.
पोलिसांनी सांगितले की, या प्रकरणाचा सखोल तपास सुरू असून, घटनास्थळाची पाहणी आणि पुरावे गोळा करण्याचे काम जोरात सुरू आहे. पीडित मुलीला मानसिक आधार देण्यासाठी पोलिस आणि सामाजिक संस्थांनी पुढाकार घेतला आहे. या घटनेमुळे भुसावळ परिसरात संताप आणि भीतीचे वातावरण पसरले असून, नागरिकांनी आरोपीवर कठोर कारवाईची मागणी केली आहे. पोलीस तपासात आणखी काही धक्कादायक माहिती समोर येण्याची शक्यता व्यक्त केली जात आहे.