अवैध हातभट्टी दारू तयार करणारे पाच जण जेरबंद

अवैध हातभट्टी दारू तयार करणारे पाच जण जेरबंद
आंबे-बाम्हणे गावशिवारात कासोदा पोलिसांची कारवाई
जळगाव : कासोदा पोलीस स्टेशन हद्दीतील आंबे-बाम्हणे गावशिवारात झाडाझुडपांच्या आडोशाला अवैधपणे हातभट्टी दारू तयार केल्याप्रकरणी पोलिसांनी मोठी कारवाई केली. २१ ऑगस्ट रोजी करण्यात आलेल्या या धाडीत पाच जणांना अटक करून त्यांच्याकडून दारू तयार करण्याचे साहित्य, कच्चे रसायन आणि हातभट्टी दारूसह एकूण ७७ हजार रुपये किमतीचा मुद्देमाल जप्त करण्यात आला आहे.

सहाय्यक पोलीस निरीक्षक निलेश राजपुत यांना मिळालेल्या गुप्त माहितीनुसार ग्रेड पो.उ.नि. रामकृष्ण पाटील, पोहेकॉ लहु हटकर, श्रीकांत ब्राम्हणे व सोनु पाचुंदे या पथकाने शिवारात छापा टाकला. या कारवाईदरम्यान २,२०० लिटर कच्चे रसायन व हातभट्टीसाठी लागणारे साहित्य मिळून आले.

या प्रकरणी सुकलाल शालिक भिल (३८), दिपक दशरथ भिल (४३), धनराज अर्जुन भिल (५९), नगराज तुकाराम भिल (४३) व वाल्मिक भिमा भिल (३९, सर्व रा. आंबे, ता. एरंडोल) या पाच जणांवर महाराष्ट्र दारुबंदी अधिनियम १९४९ कलम ६५ (फ) नुसार गुन्हे दाखल करण्यात आले आहेत.

ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर-पवार व उपविभागीय पोलीस अधिकारी विजय ठाकुरवाड यांच्या मार्गदर्शनाखाली करण्यात आली.