हातले येथे समाधान शिबिरात आ. मंगेश चव्हाणांच्या हस्ते लाभाचे वाटप

.हातले येथे समाधान शिबिरात आ. मंगेश चव्हाणांच्या हस्ते लाभाचे वाटप

चाळीसगाव : तालुक्यातील हातले येथील सामाजिक सभागृहात १३ जूनला छत्रपती शिवाजी महाराज महाराजस्व समाधान शिबिराचे आयोजन करण्यात आले होते.

या कार्यक्रमाच्या अध्यक्षस्थानी आ. मंगेश चव्हाण होते. शिबिराचे उद्घाटन झाल्यानंतर विविध प्रशासकीय विभागांनी शासकीय योजनांची माहिती देणे, लाभार्थ्यांना थेट लाभ देणे यासाठी लावलेल्या स्टॉलची आ. चव्हाण यांनी पाहणी केली. तसेच अधिकाऱ्यांना लोकाभिमुख काम करण्याच्या सूचना दिल्यात. यानंतर उपस्थित शेकडो नागरिकांना त्यांनी समाधान शिबिरे आयोजित करण्यामागची शासनाची भूमिका स्पष्ट केली. तसेच शासनाने सुरू केलेले हे शिबीर म्हणजे शासन, प्रशासन नागरिकांच्या दारी जाऊन त्यांच्या समस्या सोडवण्याचा प्रयत्न करत असल्याचे उत्तम उदाहरण आहे. सर्व विभागांच्या शासकीय योजनांचा लाभ घ्यावा, असे आवाहन त्यांनी

नागरिकांना केले.

तसेच प्रशासकीय अधिकाऱ्यांनी

मनापासून काम करून शासनाचा उद्देश सफल करावा, अशी सूचना केली. या वेळी प्रांताधिकारी प्रमोद हिले, तहसीलदार प्रशांत पाटील, महेंद्र राठोड, पोपट भोळे, शेषराव पाटील, भगवान परदेशी, राहुल पाटील, राजू राठोड, सतीश पाटे, संजय पाटील, किशोर परदेशी, योगेश चौधरी, सुभाष पाटील तसेच सर्व नायब तहसीलदार, मंडळ अधिकारी, ग्राम महसूल अधिकारी व महसूल सेवक उपस्थित होते. शिबिरामध्ये सर्व तालुक्यातील सर्व प्रशासकीय विभाग प्रमुख व कर्मचारी उपस्थित होते. सर्व लाभार्थ्यांना विविध दाखल्यांचे, लाभांचे वाटप करण्यात आले. या वेळी आरोग्य विभागाने मोफत आरोग्य तपासणी शिबिर घेतले. शिबिरात सर्व विभागांचे मिळून एकूण ९७९ लाभ विविध लाभार्थ्यांना वितरीत करण्यात आलेत.