आठवडे  बाजारात वृद्ध ममहिलेची२४ ग्रॅम सोन्याची पोत लंपास

आठवडे  बाजारात वृद्ध ममहिलेची२४ ग्रॅम सोन्याची पोत लंपास
जळगाव : शहरातील कासमवाडी परिसरातील आठवडे बाजारात खरेदीसाठी आलेल्या एका वृद्ध महिलेच्या गळ्यातील सोन्याची पोत अज्ञात चोरट्याने लंपास केल्याची घटना घडली आहे. या घटनेमुळे बाजार परिसरात एकच खळबळ उडाली आहे.

विद्युत कॉलनी येथील बाली भरतसिंग राजपूत (वय ६२) या दि. ११ एप्रिल रोजी सायंकाळी साडेपाचच्या सुमारास आठवडे बाजारात खरेदीसाठी आल्या होत्या. गर्दीचा फायदा घेत अज्ञात चोरट्याने त्यांच्या गळ्यातील सुमारे २४ ग्रॅम वजनाची, अंदाजे ८३ हजार २९५ रुपये किमतीची सोन्याची पोत अलगद चोरून नेली.

खरेदीदरम्यान काही वेळाने गळ्यातील पोत नसल्याचे लक्षात येताच महिलेने बाजारात शोधाशोध केली; मात्र तोपर्यंत चोरटा पसार झाला होता. या प्रकारामुळे नागरिकांमध्ये भीतीचे वातावरण निर्माण झाले आहे.

पोलिसांत गुन्हा दाखल
या प्रकरणी अज्ञात चोरट्याविरुद्ध गुन्हा दाखल करण्यात आला असून पोलिसांकडून सीसीटीव्ही फुटेजच्या आधारे तपास सुरू आहे.

नागरिकांना सावधगिरीचे आवाहन
गर्दीच्या ठिकाणी अशा प्रकारच्या चोरीच्या घटना वाढत असल्याने नागरिकांनी दागिने घालताना विशेष खबरदारी घ्यावी, असे आवाहन पोलिस प्रशासनाकडून करण्यात आले आहे.