आदिवासी उमेदवारांसाठी मोफत स्पर्धा परीक्षा प्रशिक्षण

आदिवासी उमेदवारांसाठी मोफत स्पर्धा परीक्षा प्रशिक्षण

प्रवेशाची अंतिम मुदत १० एप्रिल; दरमहा १,००० रुपये विद्यावेतन

जळगाव : अनुसूचित जमातीतील सुशिक्षित बेरोजगार युवक-युवतींसाठी कौशल्य विकास, रोजगार व उद्योजकता माहिती व मार्गदर्शन केंद्र, रावेर (जि. जळगाव) यांच्या वतीने स्पर्धा परीक्षांच्या पूर्वतयारीसाठी मोफत प्रशिक्षण आयोजित करण्यात आले आहे. हे प्रशिक्षण दि. १ एप्रिल ते १५ जुलै २०२६ या कालावधीत साडेतीन महिन्यांसाठी राबविण्यात येणार असून प्रवेशाची अंतिम तारीख १० एप्रिल २०२६ पर्यंत वाढविण्यात आली आहे.

या प्रशिक्षणात विविध शासकीय व निमशासकीय निवड प्रक्रियांसाठी सखोल मार्गदर्शन केले जाणार आहे. प्रशिक्षणादरम्यान पात्र उमेदवारांना उपस्थितीनुसार दरमहा १,००० रुपये विद्यावेतन दिले जाणार आहे. तसेच प्रशिक्षण पूर्ण झाल्यानंतर चार पुस्तकांचा संच आणि प्रमाणपत्र प्रदान करण्यात येणार आहे.

प्रवेशासाठी उमेदवार अनुसूचित जमाती प्रवर्गातील असून महाराष्ट्राचा रहिवासी असणे आवश्यक आहे. किमान दहावी उत्तीर्ण व वय १८ वर्षे पूर्ण असणे ही अट लागू आहे. इच्छुकांनी www.rojgar.mahaswayam.gov.in⁠� या संकेतस्थळावर नोंदणी करणे आवश्यक आहे.
मुलाखतीसाठी उमेदवारांनी शाळा सोडल्याचा दाखला, शैक्षणिक गुणपत्रिका, आधार कार्ड, बँक पासबुक, दोन पासपोर्ट फोटो तसेच जातीचा दाखला (आवश्यक) यांच्या मूळ व छायांकित प्रती सादर कराव्यात. प्रशिक्षण काळात राहण्याची व भोजनाची व्यवस्था उमेदवारांनी स्वतः करावयाची आहे.

अधिक माहितीसाठी इच्छुकांनी कौशल्य विकास, रोजगार व उद्योजकता माहिती व मार्गदर्शन केंद्र, स्टेशन रोड, रावेर येथे प्रत्यक्ष संपर्क साधावा किंवा ०२५८४-२५१९०६ या दूरध्वनी क्रमांकावर संपर्क साधावा, असे आवाहन करण्यात आले आहे.