आमदार चंद्रकांत पाटील यांची प्रकृती बिघडल्याने रुग्णालयात दाखल

आमदार चंद्रकांत पाटील यांची प्रकृती बिघडल्याने रुग्णालयात दाखल

मुक्ताईनगर प्रतिनिधी : महाराष्ट्र राज्याच्या अर्थसंकल्पीय अधिवेशनादरम्यान गुरुवारी (दि. ५ मार्च २०२६) विधानसभेतील कामकाज सुरू असताना मुक्ताईनगर मतदारसंघाचे आमदार चंद्रकांत पाटील यांची प्रकृती अचानक बिघडल्याने एकच खळबळ उडाली. अस्वस्थता जाणवताच त्यांना तातडीने वैद्यकीय मदत देण्यात आली आणि पुढील उपचारासाठी मुंबई येथील एच.एन. रिलायन्स रुग्णालयात दाखल करण्यात आले.

विधानसभेतील कामकाजादरम्यान त्यांना अचानक अस्वस्थ वाटू लागल्याने उपस्थित अधिकाऱ्यांनी तत्काळ वैद्यकीय पथकाला पाचारण केले. प्राथमिक उपचारानंतर अधिक तपासणी आणि उपचारासाठी त्यांना त्वरित रुग्णालयात हलविण्यात आले. सध्या रुग्णालयातील वरिष्ठ डॉक्टरांच्या देखरेखीखाली त्यांच्यावर उपचार सुरू असून त्यांच्या प्रकृतीवर बारकाईने लक्ष ठेवले जात आहे.

दरम्यान, जळगाव जिल्ह्याचे पालकमंत्री गुलाबराव पाटील यांनी रुग्णालयात जाऊन आमदार चंद्रकांत पाटील यांची भेट घेतली आणि त्यांच्या प्रकृतीची विचारपूस केली. तसेच डॉक्टरांशी चर्चा करून उपचारांबाबत माहिती घेतली. यावेळी शिवसेनेचे नेते व खासदार डॉ. श्रीकांत शिंदे यांनीही रुग्णालयात भेट देत त्यांच्या प्रकृतीची चौकशी केली आणि योग्य उपचार करण्याच्या सूचना डॉक्टरांना दिल्या.
सूत्रांकडून मिळालेल्या माहितीनुसार, सध्या आमदार चंद्रकांत पाटील यांची प्रकृती स्थिर असून डॉक्टरांच्या निरीक्षणाखाली त्यांच्यावर उपचार सुरू आहेत. त्यामुळे त्यांच्या समर्थकांमध्ये काही प्रमाणात दिलासा व्यक्त केला जात आहे.

आमदारांच्या आरोग्यासाठी चांगदेव येथे विशेष धार्मिक विधी
आमदार चंद्रकांत पाटील यांच्या उत्तम आरोग्यासाठी आणि दीर्घायुष्यासाठी शुक्रवारी (दि. ६ मार्च) सकाळी चांगदेव येथील ऐतिहासिक श्री योगेश्वर चांगदेव महाराज मंदिरात विशेष धार्मिक विधींचे आयोजन करण्यात आले.यावेळी गावातील शिवसैनिक, युवा सैनिक, ज्येष्ठ नागरिक आणि ग्रामस्थ मोठ्या संख्येने मंदिरात एकत्र जमले होते. सर्वांनी एकत्र येत चांगदेव महाराजांच्या चरणी प्रार्थना करत दुग्धाभिषेक केला. त्यानंतर मंदिरात भक्तिमय वातावरणात महापूजा आणि आरती करण्यात आली.