“आम्हीच जळगावचे डॉन” म्हणत कोयत्याने घरात तोडफोड

“आम्हीच जळगावचे डॉन” म्हणत कोयत्याने घरात तोडफोड

कुसुंबा येथे टोळक्याचा हैदोस; जीवघेण्या धमक्या देत नुकसान

जळगाव : प्रतिनिधी
तालुक्यातील कुसुंबा येथील सुरेशदादा जैन नगरात चार ते पाच जणांच्या टोळक्याने कोयत्याच्या धाकावर घरात घुसून तोडफोड केल्याची धक्कादायक घटना घडली. “आम्हीच जळगावचे डॉन, आत्ताच जेलमधून बाहेर आलो” अशी धमकी देत टोळक्याने परिसरात दहशत निर्माण केली.

जुन्या वादातून घरात घुसून हल्ला
अरुणाबाई करतार पवार (वय ५०) यांच्या घरी दि. २१ रोजी दुपारी चार वाजण्याच्या सुमारास हा प्रकार घडला. जुन्या वादातून संतप्त झालेल्या टोळक्याने घराचे कुलूप तोडून आत प्रवेश केला.

कोयत्याने साहित्याची तोडफोड
घरात घुसल्यानंतर आरोपींनी आरडाओरड करत “योगेश कुठे आहे, त्याला सोडणार नाही” असे म्हणत कोयत्याने घरातील भांडी व इतर साहित्याची तोडफोड केली. यामुळे घरातील मोठे नुकसान झाले.

“पुढे आला तर मुडदे पाडू” धमकी
आरोपींनी “कोणी आडवे आले तर एक-एकाचे मुडदे पाडू” अशी उघड धमकी देत नागरिकांमध्ये भीतीचे वातावरण निर्माण केले. या प्रकारामुळे परिसरात दहशत पसरली आहे.

एमआयडीसी पोलिसात गुन्हा दाखल
या घटनेप्रकरणी अरुणाबाई पवार यांनी दिलेल्या तक्रारीवरून एमआयडीसी पोलिस ठाण्यात चार ते पाच जणांच्या टोळक्याविरुद्ध गुन्हा दाखल करण्यात आला आहे.
तपास सुरू; आरोपींचा शोध
या प्रकरणाचा पुढील तपास उपनिरीक्षक राहुल तायडे करीत असून, आरोपींचा शोध घेण्यासाठी पोलिसांनी पथके रवाना केली आहेत.