आर्थिक गैरव्यवहार प्रकरणी कार्यकारी अभियंता निलंबित

आर्थिक गैरव्यवहार प्रकरणी कार्यकारी अभियंता निलंबित

महानिर्मितीची भुसावळ औष्णिक विद्युत केंद्रात धडक कारवाई; ऊर्जा विभागात खळबळ

भुसावळ : आर्थिक अनियमितता, नियमबाह्य खरेदी आणि प्रशासकीय गैरव्यवहारांच्या गंभीर आरोपांमुळे महानिर्मितीने भुसावळ औष्णिक विद्युत केंद्रातील कार्यकारी अभियंता उमेश रघुनाथ ढोक यांना तात्काळ निलंबित केले आहे. या कारवाईमुळे ऊर्जा विभागात मोठी खळबळ उडाली आहे.

विशेष समितीच्या तपासात धक्कादायक बाबी उघड
या प्रकरणाच्या चौकशीसाठी नेमलेल्या विशेष समितीच्या तपासात अनेक गंभीर त्रुटी समोर आल्या आहेत. एकाच आयटम कोडचा विविध कामांसाठी वापर, बजेट नियमांचे उल्लंघन, वर्क ऑर्डरचे विभाजन, तसेच पूर्वमंजुरी न घेता खरेदी केल्याचे आढळून आले. याशिवाय, एकाच बोलीदारांना वारंवार संधी दिल्याचा संशयही व्यक्त करण्यात आला आहे.

देयक प्रक्रियेत मोठ्या त्रुटी
पेमेंट प्रक्रियेतही गंभीर अनियमितता समोर आली असून केवळ प्रमाणपत्रांच्या आधारे कोट्यवधी रुपयांची देयके मंजूर केल्याचे निष्पन्न झाले आहे. माहिती अधिकाराच्या अर्जांना वेळेवर प्रतिसाद न दिल्याने प्रकरण अधिकच संशयास्पद बनले होते.

ऊर्जामंत्री सचिवालयाची दखल; निलंबनाची कारवाई

या सर्व बाबींची गंभीर दखल घेत ऊर्जामंत्री सचिवालयाने तातडीने कारवाईचे आदेश दिले. त्यानुसार उमेश ढोक यांना निलंबित करण्यात आले असून निलंबन काळात त्यांना दर सोमवारी खापरखेडा येथे हजेरी लावावी लागणार आहे.
महानिर्मितीने स्पष्ट केले आहे की, पारदर्शकता व शिस्त राखण्यासाठी ही कारवाई करण्यात आली असून भविष्यात अशा प्रकरणांवर अधिक कठोर पावले उचलली जाणार आहेत.