इनरव्हील क्लबतर्फे बालनिकेतन विद्यामंदिर ‘हॅपी स्कूल’ म्हणून घोषित

इनरव्हील क्लबतर्फे बालनिकेतन विद्यामंदिर ‘हॅपी स्कूल’ म्हणून घोषित

विद्यार्थिनींना सॅनिटरी पॅड वेंडिंग मशीन भेट

जळगाव । विद्यार्थ्यांच्या सर्वांगीण विकासासाठी आणि शाळेत निकोप वातावरण निर्माण करण्यासाठी इनरव्हील क्लब ऑफ जळगाव ईस्टतर्फे वर्षभर विविध समाजोपयोगी उपक्रम राबविण्यात आल्याने कमल वाणी बालनिकेतन विद्यामंदिर व ललिता वाणी विद्यालयाचे यशस्वी रूपांतर ‘हॅपी स्कूल’मध्ये करण्यात आले आहे. या कार्यक्रमाच्या उद्घाटन प्रसंगी विद्यार्थिनींच्या आरोग्यासाठी सॅनिटरी पॅड वेंडिंग आणि डिस्पोजल मशीन भेट देण्यात आले.

जुलै २०२५ पासून सुरू झालेल्या या प्रकल्पांतर्गत शाळेतील शौचालयांची संपूर्ण पुनर्बांधणी आणि रंगरंगोटी करण्यात आली आहे. शाळेत स्वच्छ आणि आरोग्यदायी वातावरण असावे, या उद्देशाने क्लबने सर्व आवश्यक निकष पूर्ण केले आहेत. विशेषतः किशोरवयीन विद्यार्थिनींच्या आरोग्याचा विचार करून शाळेत सॅनिटरी पॅड वेंडिंग मशीनसह विल्हेवाटीसाठी इन्सनेरेटर (मशीन) बसवण्यात आले आहे. हा उपक्रम इनरव्हील क्लबच्या डिस्ट्रीक्ट चेअरमन रमा गर्ग आणि पीडीसी तथा डीपीसीसी संगीता घोडगावकर यांच्या प्रमुख उपस्थितीत पार पडला. यावेळी बोलताना रमा गर्ग यांनी विद्यार्थिनींना वैयक्तिक स्वच्छता आणि आरोग्याबाबत मोलाचे मार्गदर्शन केले. त्यांच्या प्रोत्साहनपर उपस्थितीमुळे या उपक्रमाची व्याप्ती अधिक प्रभावी ठरली.

सांस्कृतिक कार्यक्रमाने स्वागत
कार्यक्रमाच्या सुरुवातीला इयत्ता पहिलीच्या विद्यार्थिनींनी अतिशय सुंदर ‘वेलकम गीत’ सादर करून उपस्थितांची मने जिंकली. त्यानंतर मान्यवरांच्या हस्ते मशीनचे अनावरण करण्यात आले. याप्रसंगी इनरव्हील क्लबच्या प्रेसिडेंट संगीता घोडगावकर, सीमरन पाटील, रितू शर्मा, मुख्याध्यापक नीलेश नाईक, ज्योती बिऱ्हाडे आणि शिक्षक-वृंद उपस्थित होते.