जळगाव: केंद्रीय शिक्षण मंत्रालयाने नुकत्याच जाहीर केलेल्या ‘नॅशनल इन्स्टिट्यूशनल रँकिंग फ्रेमवर्क’ (NIRF) च्या मानांकन यादीत कवयित्री बहिणाबाई चौधरी उत्तर महाराष्ट्र विद्यापीठाने (KBCNMU) पुन्हा एकदा आपले स्थान निश्चित केले आहे. देशातील अनुदानित राज्य सार्वजनिक विद्यापीठांच्या गटात विद्यापीठाने ५१ ते १०० या श्रेणीमध्ये स्थान कायम राखले आहे.
अध्ययन-अध्यापन आणि संशोधनाचे यश
४ सप्टेंबर रोजी जाहीर झालेल्या या मानांकनात विद्यापीठाने केलेल्या उत्कृष्ट कामगिरीचे कौतुक होत आहे. कुलगुरू प्रा. व्ही.एल. माहेश्वरी यांच्या नेतृत्वाखाली विद्यापीठाने गेल्या तीन वर्षांपासून अध्ययन, अध्यापन, आणि संशोधनात भरीव प्रगती केली आहे. राष्ट्रीय शैक्षणिक धोरणाच्या अंमलबजावणीसाठी तयार केलेली विद्यार्थ्यांसाठीची वैकल्पिक विषयांची पुस्तके आणि नवीन अभ्यासक्रम यामुळे या यशात भर पडली आहे.
एनआयआरएफ मानांकनासाठी अध्ययन, अध्यापन, संसाधने, संशोधन, परीक्षांचे निकाल आणि समावेशकता यासारख्या विविध निकषांचा विचार केला जातो. या सर्व निकषांवर विद्यापीठाने उत्तम कामगिरी केली आहे.
इतर सर्वेक्षणांमध्येही आघाडी
या आधी, एका प्रतिष्ठित इंग्रजी नियतकालिकाने केलेल्या सर्वेक्षणातही विद्यापीठाने देशातील सर्वोत्कृष्ट बहुविद्याशाखीय विद्यापीठांच्या गटात ३१ वे तर पश्चिम विभागीय विद्यापीठांच्या गटात ९ वे स्थान मिळवले होते.
विद्यार्थ्यांची संख्या, शैक्षणिक संसाधने, शोधनिबंध, पेटंट आणि संशोधन प्रकल्पांच्या बाबतीत विद्यापीठाने आघाडी घेतली आहे. तसेच, विद्यार्थ्यांना मिळणाऱ्या प्लेसमेंटमध्येही सातत्य राखले आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
