उद्यापासून नॅशनल गांधीअन लीडरशिप कॅम्प 2025 चा शुभारंभ
जळगाव (प्रतिनिधी) गांधी रिसर्च फाउंडेशन (GRF), जळगाव द्वारे नॅशनल गांधीअन लीडरशिप कॅम्प (NGLC 2025) चे आयोजन 29 ऑक्टोबर ते 9 नोव्हेंबर 2025 दरम्यान जैन फार्म्स, वाकोद, ता. जामनेर जि. जळगाव येथे केले आहे तसेच याचा समारोप जैन हिल्स गांधी तीर्थ येथे दिनांक 9 नोव्हेंबर रोजी आयोजित केला आहे. हा 12-दिवसांचा निवासी प्रशिक्षण कार्यक्रम देशभरातील 65 युवा सहभागींना एक मंचावर आणत असतो, जे विविध विद्यापीठे, संस्थांमधून आणि सामाजिक संघटनांमधून सहभाग घेत आहेत. शिबिराचा उद्देश सत्य, अहिंसा, साधेपणा, आत्मनिर्भरता आणि सामाजिक उत्तरदायित्व यासारख्या गांधीवादी मूल्यांवर आधारित नेतृत्व गुणांचा विकास करणे हा आहे.
या शिबिरात संवाद, कार्यशाळा, फील्ड भेटी, समूह चर्चा, आत्ममंथन सत्र आणि सामूहिक क्रियाकलापांद्वारे सहभागी गांधीजींच्या विचारांची आजच्या काळातील उपयुक्तता समजून घेतील. उद्घाटन समारंभात प्रसिद्ध गांधीवादी अर्थशास्त्रज्ञ आणि माजी कुलगुरू, गुजरात विद्यापीठाचे डॉ. सुदर्शन आयंगार मुख्य अतिथी म्हणून उपस्थित राहून “आजच्या युगात गांधींची उपयुक्तता” या विषयावर आपले विचार मांडतील. कॅम्प दरम्यान प्रसिद्ध व्यक्ती जसे की अंशु गुप्ता ‘गूंज’ संस्थेचे संस्थापक आणि रॅमन मॅगसेसे पुरस्काराने सन्मानित सामाजिक उद्योजक. डॉ. उल्लास जाजू सेवाग्रामचे गांधीवादी डॉक्टर आणि जनस्वास्थ्य चळवळीचे अग्रदूत. कल्याण आणि शोभिता आंध्र प्रदेशस्थित “प्रोटो व्हिलेज” चे संस्थापक, शाश्वत ग्रामीण जीवनाचे प्रेरक. रामदत्त त्रिपाठी ज्येष्ठ पत्रकार आणि गांधीवादी विचारवंत, सुशासन व लोकनीतीचे प्रवक्ते. तुषार गांधी महात्मा गांधींचे पणतू, लेखक आणि गांधीवादी मूल्यांचे प्रचारक. मनजीत सिंह फाउंडेशन फॉर इकोलॉजिकल सिक्युरिटी (FES) चे पर्यावरणतज्ज्ञ आणि सामुदायिक कार्यकर्ते. फराज खान – प्रसिद्ध संगीतकार आणि सादरकर्ते, जे गांधीजींच्या विचारांना संगीताद्वारे व्यक्त करतील. याचबरोबर प्रो. गीता धर्मपाल, गिरीश कुलकर्णी, दीपक मिश्रा आणि डॉ. अश्विन झाला यांसारखे वक्ते मानवता, नेतृत्व, संघर्ष-परिवर्तन, शाश्वत विकास आणि गांधीवादी शिक्षणावर संवाद साधतील.
या कॅम्प दरम्यान दिनांक 2 नोव्हेंबर रोजी न्यायमूर्ती चंद्रशेखर धर्माधिकारी स्मृती व्याख्यानमालेचे पाचवे पुष्प सादर केले जाणार आहे, हे वर्धा मेडिकल कॉलेजचे डॉ. उल्हास जाजू सादर करतील. ही व्याख्यानमाला सर्वांसाठी खुली आहे, यात सहभागी होण्यासाठी गांधी रिसर्च फाउंडेशनने आवाहन केले आहे.
दररोज योग, ध्यान, श्रम-संस्कार, प्रार्थना, शांतिपदयात्रा, सामूहिक गीत, राज्यनिहाय सादरीकरणे आणि सांस्कृतिक संध्याकाळ आयोजित केल्या जातील. सहभागींना अनुभूती विद्यालय, प्लास्टिक पार्क आणि अजिंठा लेणी यांसारख्या प्रेरणादायी स्थळांच्या भेटीचा योग मिळेल. शिबिराचे विशेष आकर्षण फराज़ खान यांचा संगीतमय कार्यक्रम “The Music of No Man’s Land” असेल. समारोप समारंभात श्री अशोक भाऊ जैन, अध्यक्ष, गांधी रिसर्च फाउंडेशन, मुख्य अतिथी म्हणून उपस्थित राहतील, जिथे सहभागी आपले अनुभव आणि गांधीवादी सामाजिक कार्याच्या भविष्यातील योजना इत्यादी बाबत सुसंवाद साधतील.
गांधी रिसर्च फाउंडेशनचे हे वार्षिक शिबिर भारताच्या युवकांना नैतिकता, सेवा आणि मानवतेवर आधारित नेतृत्वाच्या मार्गावर प्रेरित करण्याचा एक सशक्त प्रयत्न आहे, जेणेकरून ते समाजात शांती, न्याय आणि शाश्वत विकासाचे पुरस्कर्ते बनू शकतील.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
