उसने पैशांच्या वादातून भुसावळात भीषण हाणामारी

उसने पैशांच्या वादातून भुसावळात भीषण हाणामारी

लोखंडी पाईपने हल्ला; तिघे गंभीर जखमी, बाजारपेठ पोलिसांत गुन्हा

भुसावळ : शहरातील आगाखान वाड परिसरात उसने घेतलेल्या पैशांच्या वादातून दोन गटांमध्ये भीषण हाणामारी झाल्याची घटना उघडकीस आली आहे. या घटनेत तरुण, त्याची पत्नी आणि वडील गंभीर जखमी झाले असून भुसावळ बाजारपेठ पोलीस ठाण्यात दोघांविरुद्ध गुन्हा दाखल करण्यात आला आहे.

मिळालेल्या माहितीनुसार, शाहरुख शेख हसिक उर्फ मुन्ना (वय २८) यांनी जमिना रऊफ कुरेशी हिच्याकडून ४ हजार रुपये उसने घेतले होते. आरोपींनी पैसे परत मागितले असता शाहरुख यांनी पैसे दिल्याचे सांगितले. यावरून दोन्ही बाजूंमध्ये वाद निर्माण झाला. वाद चिघळत गेल्याने रहिम रऊफ कुरेशी व जमिना रऊफ कुरेशी यांनी शाहरुख यांच्या घरासमोर येऊन शिवीगाळ केली.

यानंतर शाब्दिक वादाचे रूपांतर हाणामारीत झाले. जमिना कुरेशी हिने लोखंडी पाईपने शाहरुख यांच्या पत्नी फरहीन हिच्यावर हल्ला केला, तर रहिम कुरेशी याने लोखंडी वस्तूने मारहाण करत जीवेठार मारण्याची धमकी दिली. या हल्ल्यात शाहरुख, त्यांची पत्नी फरहीन आणि वडील हसिद उर्फ मुन्ना हे गंभीर जखमी झाले. भांडण सोडवण्यासाठी आलेल्या मोहसिन शेख यांनाही मारहाण करण्यात आली.

या प्रकरणी भुसावळ बाजारपेठ पोलीस ठाण्यात गुन्हा दाखल करण्यात आला असून पुढील तपास पोलीस हेड कॉन्स्टेबल तेजस पारिसकर करीत आहेत.