एमआयडीसी पोलीस ठाण्यात कार्यरत पोलीस कर्मचाऱ्याची गळफास घेऊन आत्महत्या

एमआयडीसी पोलीस ठाण्यात कार्यरत पोलीस कर्मचाऱ्याची गळफास घेऊन आत्महत्या

चाळीसगाव (प्रतिनिधी) : जळगाव एमआयडीसी पोलिस ठाण्यात कार्यरत असलेल्या एका पोलिस कर्मचाऱ्याने चाळीसगाव तालुक्यातील कोदगाव येथे राहत्या घरी गळफास घेऊन आत्महत्या केल्याची धक्कादायक घटना उघडकीस आली आहे. नीलेश माधवराव पाटील असे मृत पोलिस कर्मचाऱ्याचे नाव असून त्यांच्या आत्महत्येमागील नेमके कारण अद्याप अस्पष्ट आहे.
मिळालेल्या माहितीनुसार, पोलीस कॉन्स्टेबल नीलेश पाटील हे आपल्या चुलत आजोबांच्या तेराव्याच्या कार्यक्रमासाठी कोदगाव येथे आले होते. कार्यक्रमानंतर ते रात्री गावीच आपल्या घरी थांबले होते. सोमवारी सकाळी सुमारे आठ वाजेच्या सुमारास त्यांच्या आई व पत्नीने फोनवरून संपर्क साधण्याचा प्रयत्न केला असता त्यांचा मोबाईल बंद येत असल्याचे लक्षात आले. त्यामुळे त्यांनी चुलत भाऊ सुनील पाटील यांना घरी जाऊन पाहण्यास सांगितले.
सुनील पाटील हे घराजवळ जाऊन आवाज दिला, मात्र आतून कोणताही प्रतिसाद मिळाला नाही. संशय आल्याने त्यांनी खिडकीतून आत डोकावून पाहिले असता नीलेश पाटील हे गळफास घेतलेल्या अवस्थेत दिसून आले. ही बाब लक्षात येताच त्यांनी तातडीने कुटुंबीयांना माहिती दिली. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला असून शवविच्छेदनासाठी तो चाळीसगाव येथील ग्रामीण रुग्णालयात पाठविण्यात आला आहे. आत्महत्येमागील कारणाचा पोलिसांकडून तपास सुरू असून या घटनेमुळे पोलिस दलात तसेच परिसरात हळहळ व्यक्त होत आहे.