एरंडोलच्या डॉ. ठाकूर दांपत्याचा दातृत्वाचा आदर्श; मानधनाची संपूर्ण रक्कम सामाजिक कार्यासाठी समर्पित

एरंडोलच्या डॉ. ठाकूर दांपत्याचा दातृत्वाचा आदर्श; मानधनाची संपूर्ण रक्कम सामाजिक कार्यासाठी समर्पित
​
​एरंडोल | प्रतिनिधी एरंडोल पालिकेचे नवनिर्वाचित नगराध्यक्ष डॉ. नरेंद्र ठाकूर आणि त्यांच्या धर्मपत्नी तथा नगरसेविका डॉ. गीतांजली ठाकूर यांनी राजकारणात सामाजिक बांधिलकीचा एक नवा वस्तुपाठ घालून दिला आहे. लोकप्रतिनिधी म्हणून मिळणारे शासकीय मानधन स्वतःसाठी न वापरता, ते समाजाच्या हितासाठी खर्च करण्याचा आदर्श निर्णय या दांपत्याने जाहीर केला आहे.

आपल्या मानधनाची संपूर्ण रक्कम पालिकेच्या माध्यमातून चालवल्या जाणाऱ्या कर्मवीर अभ्यासिकेच्या विकासासाठी आणि शहराची सेवा करणाऱ्या कंत्राटी सफाई कर्मचाऱ्यांच्या सोयीसुविधांसाठी वापरण्यात यावी, अशी विनंती त्यांनी मुख्याधिकाऱ्यांकडे पत्राद्वारे केली असून, त्यांच्या या दातृत्वाची सध्या जिल्ह्याभरात चर्चा रंगली आहे.

​शासकीय नियमानुसार नगराध्यक्ष डॉ. ठाकूर यांना दरमहा १५ हजार रुपये मानधन मिळते, तर नगरसेविका डॉ. गीतांजली ठाकूर यांना प्रत्येक बैठकीसाठी भत्ता दिला जातो. एरंडोल शहराच्या विकासाची धुरा सांभाळताना पायाभूत सुविधा, स्वच्छता अभियान आणि पाणीपुरवठा सुरळीत करण्याचे नियोजन सध्या युद्धपातळीवर सुरू आहे. मात्र, अनेकदा सामाजिक बांधिलकीचे छोटे-मोठे विषय हाताळताना पालिकेच्या मर्यादित निधीमुळे अडचणी येतात, ही बाब या डॉक्टर दांपत्याच्या निदर्शनास आली होती.

त्यावर उपाय म्हणून आणि प्रशासनाला हातभार लावण्यासाठी त्यांनी आपल्या हक्काच्या पैशांचा त्याग करण्याचा निर्णय घेतला. या रकमेचा विनियोग विशेषतः अभ्यासिकेत शिकणाऱ्या विद्यार्थ्यांच्या प्रगतीसाठी आणि अहोरात्र कष्ट करणाऱ्या कंत्राटी कर्मचाऱ्यांच्या कल्याणासाठी व्हावा, असे त्यांनी मुख्याधिकारी अमोल बागुल यांना दिलेल्या पत्रात नमूद केले आहे.

​या निर्णयाचे विशेष महत्त्व म्हणजे, २५ फेब्रुवारी रोजी डॉ. नरेंद्र आणि डॉ. गीतांजली ठाकूर यांचा लग्नाचा वाढदिवस होता. संसाराच्या या सुखद वळणावर कोणताही वैयक्तिक सोहळा न करता, त्यांनी समाजहित जपणाऱ्या या निर्णयाची घोषणा केली. शहराच्या सर्वांगीण विकासासाठी केवळ निधीची नव्हे, तर अशा संवेदनशील वृत्तीची गरज असल्याची भावना नागरिकांकडून व्यक्त होत आहे.

पदाचा वापर केवळ सत्तेसाठी नसून सेवेसाठी आहे, हेच या कृतीतून ठाकूर दांपत्याने सिद्ध केले आहे. त्यांच्या या निर्णयामुळे एरंडोलमधील तरुण पिढीला शैक्षणिक बळ मिळणार असून, सफाई कामगारांच्या अडचणी दूर होण्यास मोठी मदत होणार आहे.