एरंडोल पालिकेत जागतिक आरोग्य दिनानिमित्त कार्यक्रम उत्साहात

एरंडोल पालिकेत जागतिक आरोग्य दिनानिमित्त कार्यक्रम उत्साहात

महिला आरोग्य जनजागृतीसह बचत गटांना मदत; दिव्यांगांना अर्थसहाय्य वितरण

एरंडोल : जागतिक आरोग्य दिनानिमित्त एरंडोल नगरपालिकेतर्फे महिला आरोग्य जनजागृती व सामाजिक मदतीचा उपक्रम उत्साहात पार पडला. कर्मवीर अभ्यासिका येथे नगराध्यक्ष डॉ. नरेंद्र ठाकूर यांच्या अध्यक्षतेखाली कार्यक्रमाचे आयोजन करण्यात आले होते.

महिला आरोग्यावर विशेष मार्गदर्शन
कार्यक्रमात प्रमुख वक्त्या डॉ. गीतांजली ठाकूर यांनी महिलांना मासिक पाळी स्वच्छतेचे महत्त्व पटवून दिले. तसेच किशोरवयीन मुलींना कॅन्सर प्रतिबंधक लसीकरणाबाबत सविस्तर मार्गदर्शन करण्यात आले. महिलांनी स्वतःच्या आरोग्याला प्राधान्य द्यावे, असा संदेश यावेळी देण्यात आला.

बचत गट व दिव्यांगांना आर्थिक मदत
प्रधानमंत्री सूक्ष्म अन्न प्रक्रिया योजनेअंतर्गत चार महिला बचत गटांना प्रत्येकी चार लाख रुपयांचे धनादेश वितरित करण्यात आले. याशिवाय ३१७ दिव्यांगांना एकूण ७.१७ लाख रुपयांचे अर्थसहाय्य देण्यात आले.नगराध्यक्ष डॉ. नरेंद्र ठाकूर यांनी स्वतःच्या मानधनातून कर्मवीर अभ्यासिकेसाठी आरओ वॉटर मशीन भेट देत सामाजिक बांधिलकीचे उदाहरण घालून दिले. या कार्यक्रमाला महिला व नागरिकांचा मोठ्या संख्येने प्रतिसाद मिळाला.