एसटी बसचे टायर फुटल्याने अपघात; महिला जागीच ठार

एसटी बसचे टायर फुटल्याने अपघात; महिला जागीच ठार

नशिराबाद टोल नाक्याजवळील घटना

जळगाव प्रतिनिधी शहरापासून जवळ असलेल्या नशिराबाद टोल नाक्याजवळ मंगळवारी २८ ऑक्टोबर रोजी दुपारी साडेबारा वाजेच्या सुमारास झालेल्या एका भीषण अपघातात एका महिला प्रवाशाचा दुर्दैवी अंत झाला आहे .
अमळनेर आगाराची बस जळगावकडून भुसावळकडे जात असताना हा भीषण अपघात झाला. यात काही प्रवाशी किरकोळ जखमी झाले आहेत .

याबाबत माहिती अशी की , बस नशिराबाद टोल नाक्याजवळून जात असताना अचानक बसच्या समोरील चाकांपैकी एक टायर भरधाव वेगात फुटले. व बसचालकाचे वाहनावरील नियंत्रण सुटले आणि अनियत्रिंत बस थेट टोल नाक्याजवळील एका भिंतीवर जाऊन आदळली.या अपघाताच्या धक्क्याने बसमध्ये बसलेली एक महिला प्रवासी खिडकीतून बाहेर फेकली गेली. व ती महिला बसच्या मागील चाकाखाली आली आणि चिरडून तिचा जागीच मृत्यू झाला. साराबाई गणेश भोई (वय ४६) रा. पाडळसा ता. यावल असे मयत झालेल्या महिलेचे नाव असल्याची माहिती सूत्रांनी दिली आहे.
अपघातानंतर परिसरात एकच खळबळ उडाली.अपघात घडताच स्थानिक नागरिक आणि टोल नाक्याजवळील वाहनधारकांनी तातडीने घटनास्थळी धाव घेऊन मदत कार्याला सुरुवात केली. अपघाताची माहिती मिळताच नशिराबाद पोलीस ठाण्याचे कर्मचारी देखील त्वरित घटनास्थळी दाखल झाले. पोलिसांनी मदत कार्य आणि वाहतूक सुरळीत करण्यासाठी तातडीने कार्यवाही केली. पोलिसांनी पंचनामा करून मृतदेह पुढील कार्यवाहीसाठी रुग्णालयात हलविण्यात आला आहे.
या दुर्दैवी घटनेमुळे पाडळसे व नशिराबाद परिसरात हळहळ व्यक्त होत आहे.