ऑनलाईन परफ्युम व्यावसायिकाची १.२१ लाखांची फसवणूक; बनावट ऑर्डर व पेमेंटचा प्रकार उघड

ऑनलाईन परफ्युम व्यावसायिकाची १.२१ लाखांची फसवणूक; बनावट ऑर्डर व पेमेंटचा प्रकार उघड
जळगाव (प्रतिनिधी)
शहरातील फुले मार्केट परिसरातील एका ऑनलाईन परफ्युम व्यावसायिकाची तब्बल १ लाख २१ हजार २८३ रुपयांची फसवणूक झाल्याचा प्रकार उघडकीस आला आहे. बनावट नावे, ई-मेल आयडी आणि ऑनलाईन पेमेंट प्रणालीचा गैरवापर करून ही फसवणूक करण्यात आली असून, जळगाव शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, विशाल विनोद जवाहरानी (वय २६, रा. आदर्श नगर) यांचा फुले मार्केटमध्ये ‘परफ्युम्स बाय जनता शॉपी’ नावाने व्यवसाय आहे. त्यांच्या www.perfumesbyis.com⁠� या वेबसाईटवरून ‘रवी कुमार’ या नावाने एका व्यक्तीने वेगवेगळ्या मोबाईल क्रमांक आणि नावांचा वापर करून वेळोवेळी परफ्युमच्या ऑर्डर्स दिल्या.

या ऑर्डर्ससाठी ‘रेझरपे’ (Razorpay) द्वारे ऑनलाईन पेमेंट केल्याचे दाखवण्यात आले. त्यानुसार जवाहरानी यांनी संबंधित माल डीटीडीसी (DTDC) कुरिअरमार्फत पाठविला. आरोपीने वेगवेगळ्या ठिकाणी हा माल स्वीकारला. मात्र, माल मिळाल्यानंतर त्याने बँकेकडे पेमेंटबाबत तक्रार केल्याने संबंधित रक्कम बँकेकडून ‘होल्ड’वर ठेवण्यात आली.
यामुळे व्यावसायिकाचा मालही गेला आणि पैसेही अडकले, अशा प्रकारे एकूण १ लाख २१ हजार २८३ रुपयांची फसवणूक झाल्याचे समोर आले आहे.

या प्रकरणी विशाल जवाहरानी यांनी दिलेल्या फिर्यादीवरून जळगाव शहर पोलिस ठाण्यात ‘रवी कुमार’ (पूर्ण नाव व पत्ता अज्ञात) याच्याविरुद्ध गुन्हा दाखल करण्यात आला आहे. पुढील तपास पोलिस निरीक्षक सागर शिंपी यांच्या मार्गदर्शनाखाली सुरू आहे.