‘ऑल आऊट ऑपरेशन : १५२५ वाहनांची तपासणी, २.३८ लाखांचा दंड, मद्यधुंद चालकांवरही कारवाई

‘ऑल आऊट ऑपरेशन : १५२५ वाहनांची तपासणी, २.३८ लाखांचा दंड, मद्यधुंद चालकांवरही कारवाई

जळगाव (प्रतिनिधी) : जिल्ह्यात गुन्हेगारी नियंत्रणात ठेवण्यासाठी तसेच कायदा-सुव्यवस्थेचा भाग म्हणून जळगाव शहरासह संपूर्ण जिल्ह्यात जिल्हा पोलिस दलाच्या वतीने ‘ऑल आऊट ऑपरेशन’ ही विशेष मोहीम राबविण्यात आली. २१ जुलै रोजी रात्री अचानकपणे सुरू करण्यात आलेल्या या मोहिमेत वाहन तपासणीसह हॉटेल, लॉज व हद्दपार गुन्हेगारांवर लक्ष केंद्रित करण्यात आले. या कारवाईत एकूण १५२५ वाहनांची तपासणी करण्यात आली असून २ लाख ३८ हजार ८०० रुपयांचा दंड वसूल करण्यात आला.
शहरातील चौकांमध्ये २६० वाहनांची तपासणी, २० हजारांचा दंड

जळगाव शहरातील विविध प्रमुख चौकांत पोलिसांनी २६० वाहनांची तपासणी केली. या दरम्यान वाहनधारकांकडून विविध नियमभंग आढळल्याने २० हजार रुपयांचा दंड वसूल करण्यात आला. याच दरम्यान सात वाहनचालक मद्यपान करून वाहन चालवत असल्याचे निष्पन्न झाले. संबंधितांवर कठोर दंडात्मक कारवाई करण्यात आली.
कारच्या डिक्क्यांची तपासणी, दुचाकीस्वारांच्या कागदपत्रांची छाननी

महामार्ग व शहरातील प्रमुख मार्गांवर कारवाईदरम्यान पोलिसांनी अनेक चारचाकी वाहनांच्या डिक्क्यांची तपासणी केली. संशयास्पद हालचाली किंवा वस्तूंसंदर्भात कोणताही धोका नोंदविण्यात आला नाही. दुचाकीस्वारांच्या कागदपत्रांची देखील तपासणी करण्यात आली. या कारवाईत वाहनचालकांना वाहतूक नियमांबाबत जनजागृतीही करण्यात आली.
१५२५ वाहनांपैकी ३४२ वाहनधारक नियमभंगात दोषी

जिल्हाभरात एकूण १५२५ वाहनांची तपासणी करण्यात आली. त्यातील ३४२ वाहनांमध्ये नियमांचे उल्लंघन आढळल्याने संबंधितांवर मिळून २.३८ लाख रुपयांचा दंड करण्यात आला. त्याचप्रमाणे १४ जण मद्यधुंद अवस्थेत वाहन चालवताना आढळले. त्यामुळे त्यांच्यावरही गुन्हे दाखल करण्यात आले आहेत.
१७६ हॉटेल, लॉजवर छापे; हद्दपार आरोपींपैकी दोन सापडले

या विशेष मोहिमेअंतर्गत जिल्ह्यातील १७६ हॉटेल्स आणि लॉजमध्ये तपासण्या घेण्यात आल्या. यामध्ये असामाजिक व गुन्हेगारी पार्श्वभूमी असलेल्या व्यक्तींच्या हालचालींवर लक्ष ठेवण्यात आले. हद्दपार करण्यात आलेल्या २८ आरोपींचा शोध घेण्यात आला असून त्यापैकी दोन जण घरी आढळून आले. काही ठिकाणी गांजाचे सेवन करणाऱ्यांविरुद्धही कारवाई करण्यात आल्याची माहिती मिळाली आहे.
३२३ पोलिसांचा सहभाग; पोलिस अधीक्षकांचा तपासावर कटाक्ष

या कारवाईत जिल्हा पोलिस अधीक्षक डॉ. महेश्वर रेड्डी यांच्या मार्गदर्शनाखाली एकूण ५१ अधिकारी आणि २७२ अंमलदार अशा ३२३ पोलिस कर्मचारी सहभागी झाले होते. संपूर्ण कारवाईला गती देण्यासाठी उपविभागीय पोलिस अधिकारी, स्थानिक गुन्हे शाखा आणि ठाणे प्रभाराधिकाऱ्यांना पूर्वसूचना देण्यात आली होती.