ओळखीच्या नातेवाईकाचा बनाव; शिक्षिकेच्या घरातून सव्वा लाखांचे दागिने लंपास

ओळखीच्या नातेवाईकाचा बनाव; शिक्षिकेच्या घरातून सव्वा लाखांचे दागिने लंपास

निवृत्ती नगरातील घटना; जिल्हापेठ पोलिसांत गुन्हा दाखल

जळगाव (प्रतिनिधी) – शहरातील निवृत्ती नगर परिसरात ओळखीचा किंवा नातेवाईक असल्याचे भासवून घरात प्रवेश करत अज्ञात चोरट्याने तब्बल १ लाख ३५ हजार रुपये किमतीचे सोन्याचे दागिने चोरून नेल्याची धक्कादायक घटना समोर आली आहे. भरवस्तीत घडलेल्या या प्रकारामुळे परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.
याबाबत मिळालेल्या माहितीनुसार, फिर्यादी लताबाई पंडित सपकाळे (वय ५३, रा. प्लॉट नं. ३४, निवृत्ती नगर, जळगाव) या जिल्हा परिषदेत शिपाई म्हणून कार्यरत आहेत. दि. ३ फेब्रुवारी ते ७ फेब्रुवारी दरम्यान त्या घरकाम किंवा नोकरीच्या कारणास्तव व्यस्त असताना त्यांच्या घरी एक अज्ञात व्यक्ती नातेवाईक असल्याचे सांगून आला होता. संबंधित व्यक्तीने घरातील परिस्थितीचा अंदाज घेत, कोणीही नसल्याचा फायदा उचलत स्वयंपाकघरातील ओट्याखाली प्लास्टिकच्या डब्यात ठेवलेले सोन्याचे दागिने चोरून नेल्याचे समोर आले आहे.
चोरीस गेलेल्या मुद्देमालाची एकूण किंमत १ लाख ३५ हजार रुपये इतकी असल्याचे फिर्यादीत नमूद करण्यात आले आहे. हा प्रकार लक्षात येताच लताबाई सपकाळे यांनी दि. ३ मार्च रोजी जिल्हापेठ पोलीस स्टेशन येथे धाव घेऊन तक्रार दाखल केली. पोलिसांनी अज्ञात व्यक्तीविरुद्ध गुन्हा नोंदवला असून पुढील तपास सुरू केला आहे.

या प्रकरणाचा तपास पोलीस निरीक्षक अनिल वाघ यांच्या मार्गदर्शनाखाली महिला पोलीस हवालदार अनिता वाघमारे करीत आहेत. ओळखीचा भास निर्माण करून घरात प्रवेश करणाऱ्या व्यक्तींवर सहज विश्वास ठेवू नये, तसेच मौल्यवान वस्तू सुरक्षित ठिकाणी ठेवाव्यात, असे आवाहन पोलिसांनी नागरिकांना केले आहे.