कंडारीत किरकोळ वादातून तरुणाचा खून; पोलिसांची तातडीची कारवाई, तिघांना अटक

कंडारीत किरकोळ वादातून तरुणाचा खून; पोलिसांची तातडीची कारवाई, तिघांना अटक

भुसावळ : प्रतिनिधी
जळगाव जिल्ह्यात सलग घडणाऱ्या खुनांच्या घटनांत रविवारी (दि. ५ ऑक्टोबर) रात्री आणखी एका धक्कादायक घटनेची नोंद झाली आहे. भुसावळ तालुक्यातील कंडारी गावात किरकोळ वादातून झालेल्या चकमकीत एका तरुणाचा धारदार शस्त्राने खून करण्यात आला. स्थानिक गुन्हे शाखा (एलसीबी) आणि भुसावळ पोलिसांनी संयुक्त कारवाई करून अवघ्या काही तासांत तिन्ही आरोपींना अटक केली आहे.

मृत तरुणाचे नाव जितेंद्र राजेंद्र साळुंखे (वय ४०, रा. गेंदालाल मिल परिसर, जळगाव) असे आहे. हातमजुरी करून कुटुंबाचा उदरनिर्वाह करणारे साळुंखे हे शांत आणि मनमिळाऊ स्वभावाचे असल्याचे त्यांच्या परिचितांनी सांगितले. अशा व्यक्तीचा केवळ किरकोळ वादातून खून झाल्याने परिसरात तीव्र संताप आणि हळहळ व्यक्त होत आहे.

घटनेचा तपशील

मिळालेल्या माहितीनुसार, जितेंद्र साळुंखे हे रविवारी रात्री जळगाव शहरातील तीन परिचितांसोबत एका खासगी कामानिमित्त कंडारी येथे गेले होते. रात्री १० ते ११ वाजेच्या दरम्यान स्थानिक हॉटेलमध्ये मद्यपान करताना किरकोळ कारणावरून त्यांच्यात वाद झाला. हा वाद काही क्षणांतच तीव्र चकमकीत बदलला आणि आरोपींनी धारदार शस्त्राने जितेंद्रवर वार केले.

जखमी अवस्थेत त्याला तातडीने भुसावळ येथील खाजगी रुग्णालयात हलविण्यात आले; मात्र डॉक्टरांनी तपासणीअंती त्याला मृत घोषित केले.

पोलिसांची तत्पर कारवाई

घटनेची माहिती मिळताच भुसावळ पोलिसांनी तातडीने घटनास्थळी धाव घेऊन पंचनामा केला आणि तपास सुरू केला. एलसीबीच्या पथकाने वेगाने काम करत अवघ्या काही तासांत तिन्ही संशयित आरोपींना अटक करून खुनाचा पर्दाफाश केला आहे.

या प्रकरणाचा पुढील तपास भुसावळ पोलिसांकडून सुरू आहे. या घटनेमुळे कंडारी परिसरात शोककळा पसरली असून नागरिकांमध्ये भीतीचे वातावरण निर्माण झाले आहे.