कटलरी विक्रेत्यावर भर रस्त्यात हल्ला; जिल्हापेठ पोलिसांत गुन्हा दाखल

कटलरी विक्रेत्यावर भर रस्त्यात हल्ला; जिल्हापेठ पोलिसांत गुन्हा दाखल

जळगाव | प्रतिनिधी
शहरातील भजे गल्ली परिसरात कटलरी विक्री करणाऱ्या 55 वर्षीय विक्रेत्यावर भरदिवसा अचानक हल्ला करून शिवीगाळ व मारहाण केल्याची धक्कादायक घटना बुधवारी (21 मे) सकाळी घडली. या प्रकरणी जिल्हापेठ पोलीस ठाण्यात एका तरुणाविरोधात गुन्हा दाखल करण्यात आला आहे.

मधुकर चिंतामणी वाणी (वय 55, रा. ईश्वर कॉलनी, जळगाव) हे कटलरी विक्री करून आपला उदरनिर्वाह चालवतात. बुधवारी सकाळी सुमारास ते भजे गल्ली परिसरात आपल्या लोडगाडीवरून विक्री करत असताना हर्षल विजय चौरसिया (रा. नाथवाडा, शिंदे कॉलनी, जळगाव) या युवकाने कोणताही कारण नसताना मधुकर वाणी यांच्याशी वाद घालत शिवीगाळ केली आणि दमदाटी करत दुकानाच्या छत्रीची काठी उचलून त्यांच्या हातावर आणि पाठीवर जोरदार मारहाण केली. या हल्ल्यात वाणी यांना दुखापत झाली.

या प्रकरणी मधुकर वाणी यांनी दिलेल्या तक्रारीनंतर जिल्हापेठ पोलीस ठाण्यात आरोपी हर्षल चौरसिया याच्याविरुद्ध गुन्हा दाखल करण्यात आला आहे. सायंकाळी 5 वाजता अधिकृत नोंद झाली असून, पुढील तपास पोलीस कॉन्स्टेबल महेंद्र पाटील करत आहेत.