कडीकोयंडा तोडण्याचा प्रयत्न फसला; चाबी सापडताच चोरट्यांची घरफोडी

कडीकोयंडा तोडण्याचा प्रयत्न फसला; चाबी सापडताच चोरट्यांची घरफोडी

भरदिवसा कोल्हे हिल्समध्ये शिक्षिकेच्या घरातून १.३३ लाखांचा ऐवज लंपास

जळगाव : कडीकोयंडा तोडत असताना दरवाज्याजवळच चाबी सापडल्याने चोरट्यांनी तीच वापरून घराचे कुलूप उघडत भरदिवसा घरफोडी केल्याची घटना कोल्हे हिल्स परिसरात २८ मार्च रोजी घडली. या घटनेत रोख रक्कम व सोन्याचे दागिने असा एकूण १ लाख ३३ हजार ५०० रुपयांचा ऐवज लंपास करण्यात आला आहे.

तृषा चंद्रकांत संन्याशी (वय ३९, रा. कोल्हे हिल्स) या शिक्षिका असून त्या सकाळी सुमारे १० वाजता घराला कुलूप लावून शाळेत गेल्या होत्या. त्यांच्या अनुपस्थितीत सकाळी १० ते दुपारी १ दरम्यान अज्ञात चोरटे शकुंतला हाइट्स या अपार्टमेंटमध्ये शिरले. बंद घर पाहून त्यांनी प्रथम कडीकोयंडा तोडण्याचा प्रयत्न केला. मात्र दरवाज्याजवळ ठेवलेली चाबी त्यांच्या नजरेस पडताच त्यांनी ती वापरून सहजपणे कुलूप उघडले आणि घरात प्रवेश केला.

घरात शिरल्यानंतर चोरट्यांनी २० हजार रुपये रोख, सुमारे १ तोळ्याची सोन्याची चेन, विविध वजनांची तीन मंगळसूत्रे, ४ ग्रॅमची अंगठी, ४ ग्रॅमचे सोन्याचे शिक्के तसेच १ ग्रॅमचा सोन्याचा तुकडा असा एकूण १.३३ लाख रुपयांचा ऐवज चोरून नेला.

दुपारी घरी परतल्यानंतर संन्याशी यांच्या निदर्शनास ही घटना आली. त्यांनी तत्काळ पोलिसांना कळविले. या प्रकरणी तालुका पोलीस ठाण्यात अज्ञात चोरट्यांविरुद्ध गुन्हा दाखल करण्यात आला असून पोलिसांकडून पुढील तपास सुरू आहे.