कारमध्ये बसवून चाकूचा धाक; ९,७०० रुपयांची जबरी चोरी

कारमध्ये बसवून चाकूचा धाक; ९,७०० रुपयांची जबरी चोरी

अजिंठा चौफुली ते प्रितम पार्कदरम्यान घटना; एकाला अटक, तिघांचा शोध सुरू

जळगाव “रावेरला सोडतो” असे सांगून कारमध्ये बसवून घेत एका प्रवाशाला चाकूचा धाक दाखवत ९ हजार ७०० रुपये जबरीने काढून घेतल्याची धक्कादायक घटना अजिंठा चौफुली ते प्रितम पार्कदरम्यान घडली. या प्रकरणी एमआयडीसी पोलीस ठाण्यात जबरी चोरीचा गुन्हा दाखल करण्यात आला असून स्थानिक गुन्हे शाखेने तातडीने कारवाई करत वाहन चालकास अटक केली आहे.
रावेर तालुक्यातील निंभोरा येथील सलमान खान अमानउल्ला खान (वय ५२) हे दि. २८ रोजी सायंकाळी सव्वा पाच वाजेच्या सुमारास रावेरला जाण्यासाठी अजिंठा चौफुली परिसरात उभे होते. त्यावेळी तेथे आलेल्या एका कारचालकाने “शंभर रुपये द्या, तुम्हाला रावेरला सोडतो” असे सांगून त्यांना कारमध्ये बसवून घेतले. कार भुसावळ रस्त्याने पुढे जात असताना काही अंतरावर गेल्यानंतर कारमधील मागील सीटवर बसलेल्या तिघांनी सलमान खान यांचे हात पकडून ठेवले, तर एका संशयिताने चाकूचा धाक दाखवत त्यांच्या खिशातील ९ हजार ७०० रुपये जबरीने काढून घेतले.
रक्कम हिसकावून घेतल्यानंतर संशयितांनी त्यांना रस्त्यात उतरवून देत तेथून पसार झाले. घडलेला प्रकार लक्षात येताच सलमान खान यांनी तत्काळ एमआयडीसी पोलीस ठाण्यात धाव घेत आपबिती कथन केली. पोलिसांनी दि. १ रोजी अज्ञात चौघांविरुद्ध जबरी चोरीचा गुन्हा दाखल केला.
गुन्हा दाखल होताच स्थानिक गुन्हे शाखेचे पोलीस निरीक्षक राहुल गायकवाड यांच्या मार्गदर्शनाखाली पथकाने सीसीटीव्ही फुटेजच्या आधारे वाहनाचा क्रमांक शोधून काढला. त्यानुसार वाहन चालक शंभू सुभाष पाटील (वय ३२, रा. केदारनगर, पिंप्राळा) याला ताब्यात घेऊन अटक करण्यात आली. चौकशीत त्याने गुन्ह्यात वापरलेली कार पोलिसांच्या ताब्यात दिली असून ती जप्त करण्यात आली आहे.
उर्वरित तिघा साथीदारांची ओळख पटली असून त्यांचा कसून शोध सुरू आहे. पोलिसांच्या माहितीनुसार संबंधित संशयित हे रेकॉर्डवरील आरोपी असल्याचे समोर आले आहे.
या कारवाईत उपनिरीक्षक शरद बागल, सफौ अतुल वंजारी, पोहेकॉ विजय पाटील, अक्रम शेख, नितीन बाविस्कर, किशोर पाटील, रविंद्र कापडणे, राहुल रगडे, छगन तायडे, प्रदीप चवरे आदींचा समावेश होता. पुढील तपास एमआयडीसी पोलीस करीत आहेत.