कुसुंबा येथे १७ वर्षीय तरुणीची गळफास घेऊन आत्महत्य

कुसुंबा येथे १७ वर्षीय तरुणीची गळफास घेऊन आत्महत्य

घरात कोणी नसताना टोकाचे पाऊल; एमआयडीसी पोलीसांत अकस्मात मृत्यूची नोंद

जळगाव— तालुक्यातील कुसुंबा येथे राहत्या घरात कोणीही नसताना १७ वर्षीय खुशी रुपसिंग पाटील हिने गळफास घेऊन आत्महत्या केल्याची दुर्दैवी घटना दुपारच्या सुमारास उघडकीस आली. या घटनेमुळे परिसरात हळहळ व्यक्त होत असून कुटुंबीयांवर दुःखाचा डोंगर कोसळला आहे.

खुशी पाटील ही आपल्या कुटुंबासह कुसुंबा (ता. जळगाव) येथे वास्तव्यास होती. दि. २ रोजी दुपारी घरातील इतर सदस्य बाहेर गेले असताना तिने राहत्या घरात गळफास घेत आपली जीवनयात्रा संपविली. काही वेळाने कुटुंबीय घरी परतल्यानंतर हा प्रकार त्यांच्या निदर्शनास आला. त्यांनी तत्काळ खुशीला खाली उतरवून उपचारासाठी शासकीय वैद्यकीय महाविद्यालय व रुग्णालयात दाखल केले; मात्र वैद्यकीय अधिकाऱ्यांनी तपासणीअंती तिला मृत घोषित केले.

आत्महत्येचे नेमके कारण अद्याप स्पष्ट झाले नसून याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस करीत आहेत.