कोल्हापूरच्या अनुराधा भोसले यांना ‘डॉ. आचार्य अविनाशी सेवा पुरस्कार’ जाहीर

कोल्हापूरच्या अनुराधा भोसले यांना ‘डॉ. आचार्य अविनाशी सेवा पुरस्कार’ जाहीर

सह्याद्री शेतकरी उत्पादक कंपनीला संस्थास्तरीय सन्मान; १ मार्च रोजी जळगावात सन्मान सोहळा

जळगाव प्रतिनिधी : समाजाच्या तळागाळात निस्वार्थ भावनेने कार्य करणाऱ्या सेवाभावी व्यक्तींचा गौरव करण्यासाठी केशवस्मृती प्रतिष्ठान आणि जळगाव जनता सहकारी बँक लिमिटेड यांच्या संयुक्त विद्यमाने दिला जाणारा प्रतिष्ठेचा ‘डॉ. आचार्य अविनाशी सेवा पुरस्कार’ यंदा कोल्हापूर येथील ज्येष्ठ समाजसेविका अनुराधा भोसले यांना जाहीर झाला आहे.

याचबरोबर संस्थास्तरीय पुरस्कार नाशिक जिल्ह्यातील दिंडोरी तालुक्यातील मोहाडी येथील सह्याद्री फार्मर्स प्रोड्युसर कंपनी या आघाडीच्या शेतकरी उत्पादक संस्थेला जाहीर करण्यात आला आहे. कृषी क्षेत्रातील नाविन्यपूर्ण उपक्रम, शेतकऱ्यांचे संघटन व ग्रामीण भागातील आर्थिक उन्नतीसाठी केलेल्या कार्याची दखल घेऊन हा सन्मान बहाल केला जाणार आहे.

पुरस्कार वितरण समारंभ रविवार, दि. १ मार्च रोजी सायंकाळी ५ वाजता जळगाव येथील छत्रपती संभाजी राजे नाट्यगृह येथे आयोजित करण्यात आला आहे. या सोहळ्यास प्रमुख अतिथी म्हणून ज्येष्ठ समाजसेवक पोपटराव पवार तसेच राज्याचे जलसंपदा मंत्री गिरीश महाजन उपस्थित राहणार आहेत.

केशवस्मृती सेवासंस्था समूहाचे प्रमुख डॉ. भरत अमळकर आणि बँकेचे अध्यक्ष सतीश मदाने यांनी पत्रकार परिषदेत माहिती देताना सांगितले की, समाजसेवा, ग्रामीण विकास आणि शेतकरी सक्षमीकरण या क्षेत्रांत उल्लेखनीय कार्य करणाऱ्या व्यक्ती व संस्थांचा गौरव करून समाजात प्रेरणादायी कार्यसंस्कृती निर्माण करणे हा या पुरस्काराचा मुख्य उद्देश आहे. .