क्रिकेट खेळण्याच्या वादातून वृद्ध महिला, मुलगा व सून यांना मारहाण; चार जणांविरोधात गुन्हा

क्रिकेट खेळण्याच्या वादातून वृद्ध महिला, मुलगा व सून यांना मारहाण; चार जणांविरोधात गुन्हा

जळगाव, – शहरातील कालिंका माता मंदिराजवळ क्रिकेट खेळण्यावरून निर्माण झालेल्या किरकोळ वादाचे पर्यवसान हिंसक प्रकारात झाले. शनिवारी, २ ऑगस्ट रोजी रात्री ९.३० वाजता एका वृद्ध महिला आणि तिच्या कुटुंबीयांना लाकडी दांडक्याने बेदम मारहाण करण्यात आली. या प्रकरणी चार जणांविरोधात एमआयडीसी पोलीस ठाण्यात रविवारी, ३ ऑगस्ट रोजी गुन्हा दाखल करण्यात आला आहे.

वृध्द महिलेसह कुटुंबीय जखमी

पोलीस सूत्रांनी दिलेल्या माहितीनुसार, ताराबाई सुकलाल शिंदे (वय ६०) या वृद्ध महिला त्यांचा मुलगा एकनाथ शिंदे व सून सुनिता शिंदे यांच्यासोबत कालिंका माता मंदिर परिसरात राहतात. शनिवारी रात्री लहान मुलांच्या क्रिकेट खेळण्यावरून वाद झाला. या वादातून शेजारी राहणारे सुनिता आवल्या शिंदे, विजू पिंटू शिंदे, अमोल सुकलाल साळुंखे आणि देविदास लाला साळुंखे यांनी तिघांवर लाकडी दांडक्याने हल्ला केला. यामध्ये तिघांनाही गंभीर दुखापत झाली असून त्यांना जीवे मारण्याची धमकीही देण्यात आली.

गुन्हा दाखल; पुढील तपास सुरु

या घटनेनंतर पीडित महिला ताराबाई शिंदे यांनी एमआयडीसी पोलीस ठाण्यात धाव घेऊन तक्रार दिली. त्यांच्या तक्रारीवरून वरील चारही आरोपींविरोधात संबंधित कलमांअंतर्गत गुन्हा दाखल करण्यात आला आहे. पुढील तपास पोलीस हवालदार गणेश वंजारी हे करत आहेत.