खटला मागे घेण्यासाठी डॉक्टरांना भररस्त्यात मारहाण

खटला मागे घेण्यासाठी डॉक्टरांना भररस्त्यात मारहाण

लोणी सीम येथील डॉक्टरांकडून १५ हजार रुपये हिसकावले; तिघांविरुद्ध गुन्हा

पारोळा (प्रतिनिधी) : न्यायालयात दाखल असलेला खटला मागे घेण्यासाठी दबाव आणत एका ६० वर्षीय डॉक्टरांना भररस्त्यात अडवून मारहाण करत त्यांच्या खिशातील १५ हजार रुपये जबरदस्तीने हिसकावून नेल्याची धक्कादायक घटना उघडकीस आली आहे. या प्रकरणी पारोळा पोलीस ठाण्यात तिघांविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.

लोणी सीम (ता. पारोळा) येथील डॉ. कैलास निळकंठ पाटील (वय ६०) हे दि. १७ एप्रिल २०२५ रोजी दुपारी सुमारे चार वाजेच्या सुमारास आपल्या मोटारसायकलने लोणी सीम परिसरातून जात होते. त्यांच्या सोबत विलास रावण पाटील हे देखील दुचाकीवर बसलेले होते. नगाव गावाच्या अलीकडील सार्वजनिक रस्त्यावर मागून आलेल्या राखाडी रंगाच्या मारुती सुझुकी सेलेरिओ (क्र. एचएच ४६ डीव्ही ६०४८) कारने त्यांच्या दुचाकीला ओव्हरटेक करून रस्ता अडवला.

यानंतर कारमधून उतरलेल्या संशयितांनी डॉ. पाटील यांना दुचाकीवरून खाली ओढत शर्टची कॉलर पकडून चापट-बुक्क्यांनी मारहाण करण्यास सुरुवात केली. यावेळी सोबत असलेल्या महिलांनी देखील चपलेने मारहाण केल्याचे फिर्यादीत नमूद करण्यात आले आहे. “तू आमच्याविरुद्ध पारोळा न्यायालयात दाखल केलेला खटला मागे घेतला नाही, तर तुझा मुडदा पाडू,” अशी धमकी आरोपींनी दिल्याचेही फिर्यादीत म्हटले आहे.

मारहाणीनंतर संशयितांनी डॉक्टरांच्या खिशातील ५०० रुपयांच्या ३० नोटा, असे एकूण १५ हजार रुपये जबरदस्तीने हिसकावून घेतले. या घटनेनंतर डॉ. पाटील यांनी पारोळा न्यायालयात धाव घेतली. माननीय न्यायालयाच्या आदेशानुसार पारोळा पोलीस ठाण्यात गुन्हा नोंदविण्यात आला आहे.

या प्रकरणी केतन दिलीप गोतरणे (वय २६), दमयंती दिलीप गोतरणे (वय ५०), साक्षी संतोष भोईर (वय ४५, सर्व रा. कर्जत, जि. रायगड) यांच्यासह अन्य दोन अनोळखी व्यक्तींविरुद्ध गुन्हा दाखल करण्यात आला आहे. या घटनेचा पुढील तपास सहाय्यक पोलीस निरीक्षक योगेश महाजन करीत आहेत.