खरीप हंगामासाठी तयारीला वेग; आढावा बैठकीत महत्त्वाचे निर्णय

खरीप हंगामासाठी तयारीला वेग; आढावा बैठकीत महत्त्वाचे निर्णय

आमदार चंद्रकांत सोनवणे यांच्या अध्यक्षतेखाली नियोजनावर सखोल चर्चा

चोपडा (प्रतिनिधी) : आगामी खरीप हंगामाच्या पार्श्वभूमीवर आमदार चंद्रकांत सोनवणे यांच्या अध्यक्षतेखाली खरीप नियोजन व समन्वय आढावा बैठक उत्साहात पार पडली. या बैठकीत कृषी विभागाच्या विविध योजनांचा आढावा घेण्यात आला तसेच सन २०२६-२७ साठीच्या खरीप हंगामाचे सविस्तर नियोजन करण्यात आले.

बैठकीत तालुका कृषी अधिकारी दीपक साळुंखे यांनी सन २०२५-२६ दरम्यान राबविण्यात आलेल्या विविध कृषी योजनांचे सादरीकरण केले. यासोबतच आगामी हंगामात राबविण्यात येणाऱ्या मोहिमांबाबत उपस्थितांना माहिती देण्यात आली. शेतकऱ्यांच्या हितासाठी बियाण्यांची गुणवत्ता, वीज उपलब्धता आणि विविध अनुदान योजनांची अंमलबजावणी यावर विशेष भर देण्यात आला.

या प्रसंगी महाडीबीटी अंतर्गत निवड झालेल्या लाभार्थ्यांना तसेच गोपीनाथ मुंडे शेतकरी अपघात योजनेतील लाभार्थी कुटुंबांना आमदारांच्या हस्ते मंजुरी पत्रकांचे वितरण करण्यात आले. तसेच बियाणे उगवण क्षमता व वीज प्रक्रिया मोहिमेच्या पोस्टरचे अनावरणही करण्यात आले.

बैठकीस उपविभागीय अधिकारी मयूर भंगाळे, तहसीलदार भाऊसाहेब थोरात, गटविकास अधिकारी अंजली बर्गे यांच्यासह विविध विभागांचे अधिकारी उपस्थित होते. तालुक्यातील सर्व मंडळ कृषी अधिकारी, उपकृषी अधिकारी आणि सहाय्यक कृषी अधिकारी यांनीही मोठ्या संख्येने सहभाग नोंदवला.