गतीमंद महिलेच्या दोन्ही डोळ्यातील मोतीबिंदूवर यशस्वी शस्त्रक्रिया

गतीमंद महिलेच्या दोन्ही डोळ्यातील मोतीबिंदूवर यशस्वी शस्त्रक्रिया

डॉ. उल्हास पाटील रुग्णालयातील नेत्रतज्ज्ञ डॉ. मयूरी निलावाड यांच्या टीमचे यश

जळगाव प्रतिनिधी लहानपणापासूनच डाउन सिंड्रोम (गतीमंद) असलेल्या एका महिलेच्या दोन्ही डोळ्यांतील मोतीबिंदूवर यशस्वी शस्त्रक्रिया करून तिची दृष्टी पुन्हा पूर्ववत करण्यात डॉक्टरांना यश आले आहे. ही शस्त्रक्रिया जळगाव येथील डॉ. उल्हास पाटील रुग्णालयात करण्यात आली असून नेत्रतज्ज्ञ डॉ. मयूरी निलावाड व त्यांच्या टीमने ही जोखमीची शस्त्रक्रिया यशस्वीपणे पूर्ण केली.

याबाबत माहिती अशी की, नयना वाणी (वय ३८रा. भुसावळ) ही महिला लहानपणापासूनच डाउन सिंड्रोम या अवस्थेमुळे गतीमंद होती. गेल्या काही महिन्यांपासून तिच्या दोन्ही डोळ्यांची दृष्टी कमी होत चालली होती. सुरुवातीला कुटुंबीयांना नेमकी समस्या लक्षात येत नव्हती. मात्र हळूहळू तिला वस्तू स्पष्ट दिसेनाशा झाल्याने कुटुंबीयांनी तिला जळगाव येथील डॉ. उल्हास पाटील रुग्णालयात नेत्र तपासणीसाठी आणले.

डॉक्टरांसमोर मोठे आव्हान
रुग्णालयात डॉ. रेणुका पाटील यांच्या मार्गदर्शनाखाली डॉ. मयूरी निलावाड यांनी तपासणी केल्यानंतर तिच्या दोन्ही डोळ्यांमध्ये मोतीबिंदू असल्याचे निदान झाले. गतीमंद असल्यामुळे शस्त्रक्रिया करणे हे डॉक्टरांसमोर मोठे आव्हान होते. अशा रुग्णांमध्ये शस्त्रक्रियेदरम्यान हालचाल होण्याची शक्यता जास्त असते, त्यामुळे विशेष काळजी घेणे आवश्यक असते. ही परिस्थिती लक्षात घेऊन नेत्रतज्ज्ञ डॉ. मयूरी निलावाड व डॉ. अभिजीत, डॉ. उर्मी, भूलशास्त्र तज्ज्ञ डॉ. शितल, डॉ. आकांक्षा यांच्या टीमने विशेष नियोजन करून एकाच सेटींगमध्ये दोन्ही डोळ्यांतील मोतीबिंदू काढून कृत्रिम लेन्स बसविण्याची शस्त्रक्रिया करण्यात आली. अत्यंत काळजीपूर्वक व तांत्रिक अचूकतेने ही प्रक्रिया पूर्ण करण्यात आली. शस्त्रक्रिया यशस्वी ठरली असून काही दिवसांच्या उपचारांनंतर महिलेची दृष्टी लक्षणीयरीत्या सुधारली आहे.

कोट….
डाउन सिंड्रोम असलेल्या रुग्णांमध्ये मोतीबिंदूची शस्त्रक्रिया करणे तुलनेने अधिक आव्हानात्मक असते. रुग्ण सहकार्य करू शकत नसल्यामुळे भूल देऊन शस्त्रक्रिया करावी लागते. योग्य नियोजन, तंत्रज्ञान आणि अनुभवी टीमच्या मदतीने ही शस्त्रक्रिया यशस्वीरीत्या पूर्ण करता आली. वेळेत निदान व उपचार केल्यास मोतीबिंदूमुळे होणारे अंधत्व टाळता येते.
– डॉ. मयूरी निलावाड, नेत्रतज्ज्ञ, डॉ. उल्हास पाटील रूग्णालय.