गांजाची तस्करी करणाऱ्याला भुसावळात पकडले ; एलसीबी आणि बाजारपेठ पोलिसांची कारवाई

गांजाची तस्करी करणाऱ्याला भुसावळात पकडले ; एलसीबी आणि बाजारपेठ पोलिसांची कारवाई

भुसावळ: जिल्ह्यात अमली पदार्थ तस्करीवर नियंत्रण मिळवण्यासाठी पोलीस अधीक्षक डॉ. महेश्वर रेड्डी यांनी दिलेल्या विशेष सूचनेनुसार स्थानिक गुन्हे शाखा (LCB) आणि भुसावळ बाजारपेठ पोलिसांनी संयुक्त कारवाई केली आहे. या कारवाईत गांजाची तस्करी करणाऱ्या एका संशयिताला रंगेहात अटक करण्यात आली असून, त्याच्याकडून सुमारे २ लाख ९० हजार रुपये किमतीचा गांजा आणि इतर मुद्देमाल जप्त करण्यात आला आहे.

आज, २२ ऑगस्ट रोजी मध्यरात्री २ वाजण्याच्या सुमारास स्थानिक गुन्हे शाखेचे पोलीस हवालदार गोपाळ गव्हाळे यांना एक व्यक्ती काळसर रंगाच्या मोटारसायकलवरून भुसावळ शहरात गांजाची बेकायदेशीर वाहतूक करत असल्याची गोपनीय माहिती मिळाली. ही माहिती त्यांनी तात्काळ वरिष्ठ पोलीस निरीक्षक संदीप पाटील यांना दिली. त्यानंतर, दोन्ही पोलीस विभागांचे संयुक्त पथक तयार करण्यात आले.

पोलिस पथकाने हॉटेल सुरुची इनसमोरील राष्ट्रीय महामार्गावर सापळा रचला. माहितीनुसार, एका होन्डा शाईन मोटारसायकलवरून एक संशयास्पद व्यक्ती येताना दिसली. पोलिसांनी त्याला थांबवण्याचा प्रयत्न केला असता, तो पळून जाऊ लागला. मात्र, पोलिसांनी त्याचा पाठलाग करून त्याला मोठ्या शिताफीने ताब्यात घेतले. चौकशीत त्याने आपले नाव अनारसिंग वालसिंग भिलाला (वय ३०, रा. शमलकोट, मध्य प्रदेश) असे सांगितले.

अटक केलेल्या आरोपीकडून १० किलो २७५ ग्रॅम वजनाचा गांजा, एक मोटारसायकल आणि मोबाईल हॅंडसेट असा एकूण २ लाख ९० हजार रुपयांचा मुद्देमाल जप्त करण्यात आला आहे. पोलीस कॉन्स्टेबल विकास सातदिवे यांच्या तक्रारीवरून भुसावळ बाजारपेठ पोलीस ठाण्यात एनडीपीएस ॲक्ट अंतर्गत गुन्हा दाखल करण्यात आला आहे. ही कारवाई पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांच्या मार्गदर्शनाखाली करण्यात आली असून, पोलीस पुढील तपास करत आहेत.