गाडीचा कट लागल्यावरून तरुणावर जीवघेणा हल्ला

गाडीचा कट लागल्यावरून तरुणावर जीवघेणा हल्ला

लोखंडी कड्या व ब्लेडने वार; दोघांविरुद्ध गुन्हा दाखल

जळगाव (प्रतिनिधी) : किरकोळ कारणावरून वाद चिघळत गाडीचा कट लागल्याच्या कारणावरून एका तरुणावर लोखंडी कड्या व स्टीलच्या ब्लेडने जीवघेणा हल्ला केल्याची घटना खेडी गावात घडली. या हल्ल्यात तरुण गंभीर जखमी झाला असून एमआयडीसी पोलीस ठाण्यात दोघांविरुद्ध गुन्हा दाखल करण्यात आला आहे.
खेडी (ता. जळगाव) येथील विक्रांत वासुदेव राणे (वय २०) हा शिक्षण घेत असून ६ एप्रिल रोजी दुपारी दीड वाजेच्या सुमारास गाडीचा कट लागल्याच्या कारणावरून त्याचा संशयित जितू पाटील व निखील पाटील यांच्याशी वाद झाला. सुरुवातीला दोघांनी त्याला चापटा व बुक्क्यांनी मारहाण केली. त्यानंतर वाद अधिक चिघळत त्यांनी लोखंडी कड्या व स्टीलच्या ब्लेडने विक्रांतवर वार करून त्याला गंभीर जखमी केले.
जखमी विक्रांत राणे याला तातडीने जिल्हा शासकीय रुग्णालयात दाखल करण्यात आले. उपचारानंतर त्याने ७ एप्रिल रोजी एमआयडीसी पोलीस ठाण्यात फिर्याद दिली. त्यानुसार दोन्ही संशयितांविरुद्ध गुन्हा नोंदविण्यात आला असून पुढील तपास पोलीस हवालदार दीपक महाजन करत आहेत.