गावठी पिस्तूल घेऊन दहशत माजविणाऱ्या तरुणाला अटक

गावठी पिस्तूल घेऊन दहशत माजविणाऱ्या तरुणाला अटक

एमआयडीसी पोलिसांची कारवाई

जळगाव प्रतिनिधी I एमआयडीसी पोलिसांनी कुसुंबा परिसरातून संशयित आरोपी अमोल सुरेश खैरनार (वय २८, रा. सुप्रीम कॉलनी, जळगाव) याला अटक केली असून, त्याच्याकडून १० हजार रुपये किमतीचा गावठी कट्टा जप्त करण्यात आला आहे.

३० ऑगस्ट रोजी रात्री साडेआठच्या सुमारास कुसुंबा गावाजवळ एका व्यक्तीने गावठी पिस्तूल घेऊन दहशत माजवत असल्याची गुप्त माहिती पोलिसांना मिळाली. पोलिस निरीक्षक बबन आव्हाड यांच्या आदेशानुसार उपनिरीक्षक राहुल तायडे, चंद्रकांत धनके आणि पोलीस कर्मचारी गणेश ठाकरे, किरण पाटील, नितीन ठाकूर, राहुल घेटे यांचे पथक घटनास्थळी रवाना झाले.

पोलिसांची गाडी पाहताच संशयित आरोपीने पळून जाण्याचा प्रयत्न केला, मात्र पोलिसांनी पाठलाग करून त्याला शिताफीने पकडले. झडतीत त्याच्या कमरेला गावठी कट्टा आढळून आला. पोलिसांनी पंचनामा करून तो कट्टा जप्त केला.

पोलीस शिपाई राहुल घेटे यांनी दिलेल्या फिर्यादीनुसार एमआयडीसी पोलीस स्टेशनमध्ये गुन्हा दाखल करण्यात आला असून, पुढील तपास सुरू आहे. ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गनापुरे यांच्या मार्गदर्शनाखाली करण्यात आली आहे.