गुंगीचे औषध देऊन विद्यार्थ्यांवर अत्याचार; इगतपुरीतील वसतिगृहातील धक्कादायक प्रकार

गुंगीचे औषध देऊन विद्यार्थ्यांवर अत्याचार; इगतपुरीतील वसतिगृहातील धक्कादायक प्रकार
इगतपुरी : शहरातील समाजकल्याण विभागाच्या वसतिगृहात पाचवी ते सातवीतील विद्यार्थ्यांना गुंगीचे औषध, मद्य व भांग देऊन त्यांच्यावर लैंगिक अत्याचार केल्याचा धक्कादायक प्रकार उघडकीस आला आहे. या प्रकरणी दहावीतील सात विधिसंघर्षित विद्यार्थ्यांसह वसतिगृह अधीक्षकाविरुद्ध इगतपुरी पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, वसतिगृहातील दहावीतील विद्यार्थ्यांनी पाचवी ते सातवीतील मुलांना गुंगीच्या गोळ्या देत वसतिगृहाबाहेरील झुडपांमध्ये नेऊन वेळोवेळी अत्याचार केल्याचा आरोप आहे.

गेल्या सुमारे सात महिन्यांपासून हा प्रकार सुरू असल्याचे समोर आले आहे. भीतीपोटी पीडित विद्यार्थ्यांनी सुरुवातीला कोणालाही माहिती दिली नव्हती.
पीडित विद्यार्थ्यांनी अखेर वसतिगृह अधीक्षक सुशांत दुधसागरे यांच्याकडे तक्रार केली; मात्र त्यांनी या गंभीर प्रकाराकडे दुर्लक्ष केल्याचा आरोप करण्यात आला आहे. त्यामुळे त्यांच्यावरही गुन्हा दाखल करण्यात आला आहे. या प्रकरणाची वरिष्ठ स्तरावर दखल घेण्यात आली असून जिल्हाधिकारी आयुष प्रसाद यांनीही तपासाबाबत सूचना दिल्या आहेत. बालकल्याण समितीकडूनही स्वतंत्र चौकशी करण्यात येणार आहे.

“इगतपुरीच्या वसतिगृहातील हा प्रकार अत्यंत गंभीर असून, अल्पवयीन मुलांवर अत्याचार करणाऱ्यांवर पोक्सो कायद्यांतर्गत गुन्हा दाखल करण्यात आला आहे. या प्रकरणाची सखोल चौकशी केली जाईल.”
— आयुष प्रसाद, जिल्हाधिकारी