गुटक्याच्या अवैध साठ्यावर रावेर पोलिसांची धडक कारवाई; सहा लाख 34 हजाराचा मुद्देमाल जप्त

गुटक्याच्या अवैध साठ्यावर रावेर पोलिसांची धडक कारवाई; सहा लाख 34 हजाराचा मुद्देमाल जप्त

रावेर | प्रतिनिधी: शहरात अवैधरीत्या आणण्यात आलेल्या गुटख्याच्या साठ्यावर रावेर पोलिसांनी धडक कारवाई केली असून, सुमारे ६ लाख ३४ हजार रुपयांचा मुद्देमाल जप्त करण्यात आला आहे. या कारवाईत एका आरोपीला अटक करण्यात आली असून, अन्य तीन आरोपी फरार आहेत. याप्रकरणी रावेर पोलीस ठाण्यात गुन्हा दाखल करण्यात आला आहे.

पोलिसांना मिळालेल्या गुप्त माहितीच्या आधारे मध्य प्रदेशातील बऱ्हाणपूर येथून रावेरकडे (एमएच ०४ एचएन १७०९) क्रमांकाच्या टाटा वाहनातून मोठ्या प्रमाणावर गुटखा आणला जात असल्याचे समजले. त्यानुसार स्वस्तिक टॉकीजजवळील बऱ्हाणपूर रोडवर पोलिसांनी सापळा रचून सदर वाहन थांबवले. वाहनाची तपासणी केली असता, त्यामध्ये विविध प्रकारच्या गुटख्याच्या गोण्या आढळून आल्या. गुटख्याची एकूण किंमत सुमारे २ लाख ३४ हजार रुपये असून, वाहतुकीसाठी वापरलेली सुमारे ४ लाख रुपये किमतीची गाडीही पोलिसांनी जप्त केली आहे.

याप्रकरणी पोलीस कॉन्स्टेबल सुकेश तडवी यांच्या फिर्यादीवरून शेख मुजाहिद शेख रफिक याला अटक करण्यात आली आहे, तर आसिफ अहमद जमील अहमद, कल्लू उर्फ मोहसिन शेख युनुस शेख आणि एक अनोळखी व्यक्ती हे तिघे अद्याप फरार आहेत. संबंधितांवर विविध कलमांखाली गुन्हा दाखल करून पुढील तपास सुरू आहे.