गोलाणी मार्केटमध्ये चष्मा चोरीच्या संशयातून तरुणाला बेदम मारहाण

गोलाणी मार्केटमध्ये चष्मा चोरीच्या संशयातून तरुणाला बेदम मारहाण

जळगाव (प्रतिनिधी) – शहरातील गोलाणी मार्केटमध्ये चष्मा चोरी केल्याच्या संशयातून चार जणांनी एका भाजीपाला विक्रेत्या तरुणाला शिवीगाळ करत लाथाबुक्क्यांनी बेदम मारहाण केली. या हल्ल्यात तरुण गंभीर जखमी झाला असून, याप्रकरणी जळगाव शहर पोलीस ठाण्यात चार जणांविरोधात गुन्हा दाखल करण्यात आला आहे. ही घटना सोमवारी, ९ जून रोजी दुपारी ४.३० वाजण्याच्या सुमारास घडली.

दिनेश संजय चौधरी (वय २५, रा. कांचन नगर, जळगाव) हा तरुण आपल्या मित्रासोबत गोलाणी मार्केटमधील फेमस मोबाईल दुकानासमोर थांबलेला असताना ही घटना घडली. त्याचवेळी जावेद यांचे चष्म्याच्या दुकानातील एका व्यक्तीने (फोनवर बोलताना चष्मा डोळ्यावर लावून) दुकानाबाहेर येत असताना चष्मा हरवला असल्याचा संशय व्यक्त केला.

या घटनेनंतर दुकानातील जावेद, शहबाज, बशीर आणि तन्वीर (पूर्ण नाव अज्ञात) या चौघांनी दिनेशला चष्मा चोरी केल्याचा आरोप करत शिवीगाळ केली आणि लाथाबुक्क्यांनी बेदम मारहाण केली. या मारहाणीत दिनेश गंभीर जखमी झाला.

रात्री ११ वाजता दिनेश चौधरी यांनी जळगाव शहर पोलीस ठाण्यात दिलेल्या फिर्यादीवरून या चौघांविरोधात गुन्हा दाखल करण्यात आला आहे. याप्रकरणी पुढील तपास पोलीस हेडकॉन्स्टेबल दिपक शिरसाठ करीत आहेत.