चादरीच्या उधारीचे पैसे मागितल्याने व्यापाऱ्यावर जीवघेणा हल्ला

चादरीच्या उधारीचे पैसे मागितल्याने व्यापाऱ्यावर जीवघेणा हल्ला

सहा जणांविरुद्ध खुनाचा प्रयत्नाचा गुन्हा दाखल

कासोदा (प्रतिनिधी):
चादरी विक्रीच्या व्यवसायातील उधारीचे २३ हजार रुपये वेळेत परत न मिळाल्याबद्दल विचारणा केली असता, सहा जणांच्या टोळीने एका व्यापाऱ्यावर लोखंडी फायटर आणि रॉडने जीवघेणा हल्ला केल्याची धक्कादायक घटना कासोदा येथे घडली आहे. याप्रकरणी कासोदा पोलीस ठाण्यात खुनाचा प्रयत्न केल्याचा गुन्हा दाखल करण्यात आला असून सर्व आरोपींना अटक करण्यात आली आहे.

कासोदा येथील गरीब नवाज चौकात राहणारे हसीन खान जमशेर खान (वय ३३) हे चादरी विक्रीचा व्यवसाय करतात. आरोपींनी त्यांच्याकडून चादरी घेतल्या होत्या, ज्याचे २३ हजार रुपये उधारीवर होते. ही रक्कम ठरलेल्या मुदतीत न दिल्याने हसीन खान यांनी आरोपींना पैशांची मागणी केली. याचा राग येऊन आरोपींनी बेकायदेशीर मंडळी जमवून हसीन खान यांच्या दुकानात प्रवेश केला.
“पैसे देणार नाही, तू माझे काय उपटून घेतो?” अशी धमकी देत आरोपींनी हसीन खान यांना लाथाबुक्क्यांनी मारहाण केली. यावेळी लोखंडी फायटरने त्यांच्या तोंडावर, ओठावर आणि डोळ्यावर गंभीर प्रहार करण्यात आले. तसेच लोखंडी रॉडने वार करून त्यांना जखमी केले आणि त्यांच्या गळ्यातील चांदीची चेन तोडून नुकसान केले.

या प्रकरणी हसीन खान यांनी दिलेल्या फिर्यादीवरून कासोदा पोलीस ठाण्यात सहा आरोपींविरुद्ध गुन्हा दाखल करण्यात आला आहे. शोएब खान मुन्सफ खान, इमरान खान मुन्सफ खान, इरफान उर्फ इप्पु खान मुन्सफ खान, शाकीब खान मुन्सफ खान, आवेश खान सिद्धीक खान, मुन्सफ खान अलीयार खान (सर्व रा. गांधी चौक झोपडपट्टी, कासोदा) असे त्यांचे नाव आहे.

या घटनेची माहिती मिळताच कासोदा पोलीस ठाण्याचे प्रभारी अधिकारी सपोनि श्रीकांत अंकुश पाटील यांनी तातडीने सूत्रे हलवली. खुनाचा प्रयत्न केल्याचा गुन्हा दाखल करण्यात आला आहे. सर्व आरोपींना १२ एप्रिल २०२६ रोजी रात्री २०:१४ वाजता अटक करण्यात आली आहे. या प्रकरणाचा पुढील तपास पोलीस उपनिरीक्षक धर्मराज वसंतराव पाटील करत आहेत. उधारीच्या पैशांवरून झालेल्या या हिंसक हल्ल्यामुळे परिसरात भीतीचे वातावरण पसरले आहे.