चाळीसगावमधील शाळेत मोठा आर्थिक गैरव्यवहार उघडकीस

चाळीसगावमधील शाळेत मोठा आर्थिक गैरव्यवहार उघडकीस

शिक्षक आणि शिक्षकेतर कर्मचाऱ्यांच्या पगारातून ९७ लाखांची कपात

चाळीसगाव – चाळीसगाव शहरातील जय हिंद माध्यमिक व उच्च माध्यमिक विद्यालयात मोठा आर्थिक गैरव्यवहार उघडकीस आला आहे. शाळेचे सचिव, मुख्याध्यापक आणि क्लार्क यांनी संगनमत करून १५ शिक्षक आणि शिक्षकेतर कर्मचाऱ्यांच्या पगारातून तब्बल ९७ लाख रुपये कपात केल्याचे समोर आले आहे. याप्रकरणी चाळीसगाव पोलीस ठाण्यात गुन्हा दाखल करण्यात आला आहे.
चाळीसगाव पंचायत समितीचे तालुका विस्तार अधिकारी विलास आनंदा भोई यांनी या प्रकरणी फिर्याद दिली आहे. त्यांच्या तक्रारीनुसार, महात्मा फुले सामाजिक व शैक्षणिक विकास मंडळ संचलित जय हिंद विद्यालयातील शिक्षक आणि शिक्षकेतर कर्मचाऱ्यांच्या पगार अनुदानातून मोठ्या प्रमाणात पैसे कपात केले गेले.

शाळेचे सचिव अशोक हरी खलाणे, मुख्याध्यापक अभिजीत जगन्नाथ खलाणे आणि क्लार्क ज्ञानेश्वर दगा महाजन यांनी संगनमत करून हा आर्थिक गैरव्यवहार केल्याचे सांगितले जात आहे.

तक्रारीत नमूद केल्याप्रमाणे, संबंधित पदाधिकाऱ्यांनी २००६ ते डिसेंबर २०२४ दरम्यान शिक्षक आणि कर्मचाऱ्यांच्या पगारातून मोठी रक्कम कपात केली. काही शिक्षकांना नोकरीवरून काढून टाकण्याची धमकी देऊन जबरदस्तीने संमतीपत्रावर सह्या करवून घेण्यात आल्या, तर काही शिक्षकांची कुठलीही परवानगी न घेता त्यांच्या वेतनातून पैसे कपात करण्यात आले.

हा प्रकार शासनाच्या नियमांचे उल्लंघन करून करण्यात आला आहे, ज्यामुळे शिक्षण संस्थेच्या आर्थिक व्यवस्थेवर मोठा प्रश्नचिन्ह उपस्थित होतो.

या गैरव्यवहारामुळे शिक्षकांमध्ये तीव्र संताप आहे. अशा प्रकारच्या आर्थिक गैरव्यवहारांना बळी पडलेले शिक्षक न्यायाची मागणी करत आहेत. शिक्षण संस्थांमध्ये होणाऱ्या अशा प्रकारच्या गैरव्यवहारांवर कठोर कारवाई होण्याची मागणी होत आहे.

शाळेचे सचिव, मुख्याध्यापक आणि क्लार्क यांच्याविरोधात फसवणुकीसह विविध कलमांखाली गुन्हा दाखल करण्यात आला आहे. पोलीस पुढील तपास करत आहेत, आणि दोषींवर कडक कारवाई होणार का, याकडे सर्वांचे लक्ष लागले आहे.