चाळीसगावला आता ‘अप्पर जिल्हाधिकारी’ कार्यालय!
जळगावसह राज्यातील ११ जिल्ह्यांत नव्या कार्यालयांना मंजुरी; महसूलमंत्री चंद्रशेखर बावनकुळे यांची मोठी घोषणा
मुंबई/जळगाव | विशेष प्रतिनिधी
दुर्गम भागातील नागरिकांची जिल्हा मुख्यालयापर्यंत होणारी पायपीट थांबवण्यासाठी आणि प्रशासकीय कामकाजाला गती देण्यासाठी राज्य सरकारने मैलाचा दगड ठरणारा निर्णय घेतला आहे. जळगाव जिल्ह्यातील चाळीसगावसह राज्यातील ११ उपविभागांमध्ये नवीन ‘अप्पर जिल्हाधिकारी’ (ADM) कार्यालये स्थापन करण्याची अधिकृत घोषणा महसूलमंत्री चंद्रशेखर बावनकुळे यांनी विधान परिषदेत केली. या निर्णयामुळे जळगावच्या पश्चिमेकडील तालुक्यांच्या महसूल प्रशासनावर आता स्थानिक स्तरावरूनच भक्कम पकड निर्माण होणार आहे.
प्रशासनाची व्याप्ती वाढली; १४३ पदांची निर्मिती
वाढती लोकसंख्या आणि प्रशासकीय कामाचा वाढता व्याप लक्षात घेता, सरकारने या नवीन कार्यालयांसाठी प्रत्येकी १३ कर्मचारी याप्रमाणे एकूण १४३ नव्या पदांच्या निर्मितीला मंत्रिमंडळ बैठकीत मान्यता दिली आहे. उच्चस्तरीय सचिव समितीने जानेवारी २०२६ मध्ये या प्रस्तावांची तांत्रिक पडताळणी पूर्ण केली होती. आता विभागीय आयुक्तांमार्फत या कार्यालयांच्या जागा निश्चितीची प्रक्रिया जलद गतीने पूर्ण होऊन प्रत्यक्ष कामकाजाला सुरुवात होणार आहे.
राज्यातील ‘या’ ११ केंद्रांवर होणार नवी कार्यालये:
जळगाव जिल्ह्यातील चाळीसगाव व्यतिरिक्त राज्यातील इतर महत्त्वाच्या शहरांमध्येही ही कार्यालये सुरू होत आहेत:
- पुणे: बारामती | ठाणे: कल्याण | सोलापूर: पंढरपूर
- सातारा: फलटण | रत्नागिरी: दापोली | नांदेड: किनवट
- अमरावती: अचलपूर | यवतमाळ: पुसद | बुलढाणा: खामगाव | नागपूर: कळमेश्वर
भूमापन प्रकरणांचा होणार वेगवान निपटारा
शेतकऱ्यांसाठी अत्यंत जिव्हाळ्याचा विषय असलेल्या जमिनीच्या मोजणी प्रकरणांबाबतही महसूलमंत्र्यांनी दिलासादायक माहिती दिली. जमिनीच्या मोजणीत पारदर्शकता आणण्यासाठी आणि प्रलंबित प्रकरणे निकाली काढण्यासाठी परवानाधारक भूमापक आणि अधिकाऱ्यांची विशेष नियुक्ती केली जाणार आहे. यामुळे अनेक वर्षांपासून रखडलेले जमिनीचे वाद मिटण्यास मदत होणार असून हजारो शेतकऱ्यांना याचा थेट लाभ मिळेल.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
