चाळीसगावात भरधाव चारचाकीची दुचाकीला धडक ; महिला ठार

चाळीसगावात भरधाव चारचाकीची दुचाकीला धडक ; महिला ठार

५ ते ६ जण जखमी ; चाळीसगाव ते छत्रपती संभाजीनगरमहामार्गावरील रांजणगाव फाट्यावरील घटना

चाळीसगाव I प्रतिनिधी

भरधाव कूझरने दिलेल्या धडकेत दुचाकीवरील महिला जागीच ठार तर ६ जण जखमी झाल्याची घटना चाळीसगाव ते छत्रपती संभाजीनगर रस्त्यावरील रांजणगाव फाट्यावर महामार्ग क्रमांक २११ वर १९ रोजी दुपारी २ वाजेच्या सुमारास घडली. चंदाबाई मलखान पवार (रा. कोंगानगर, ता. चाळीसगाव) असे मयत महिलेचे नाव आहे.

यासंदर्भात माहिती अशी कि, चाळीसगाव तालुक्यातील खेडें तांडा येथील रहिवाशी असलेला कृष्णा जाधव (वय १९) हा दुचाकी (एमएच १९, एएस ८४७३) वर त्याची आजी चंदाबाई मलखान पवार यांना घेवून चाळीसगाव कडे जात असतांना रांजणगाव फाट्यावर चाळीसगावकडून संभाजीनगरकडे भरधाव वेगाने जाणाऱ्या कुझर (एमएच- २०, सीएच- ६५२२) या चारचाकी व दुचाकीची समोरासमोर धडक झाली.

या अपघातात दुचाकीवरील चंदाबाई मलखान पवार यांचा जागीच मृत्यू झाल्याची घटना १९ जानेवारीला दुपारी १.३० ते २ वाजेदरम्यान घडली. तर दुचाकी चालक कृष्णा संजय जाधव यासह कुझरमधील चालक व प्रवासी असे ५ जण जखमी झाले आहेत. या अपघातात चारचाकी वाहन रस्त्यावरच उलटले होते. दरम्यान, जखमींवर खासगी रुग्णालयात उपचार सुरु आहेत. रात्री उशिरापर्यंत चाळीसगाव ग्रामीण पोलीस ठाण्यात अपघाताची नोंद करण्यात आली आहे.