चाळीसगावात महिलेच्या डोळ्यात मिरची पूड फेकून सोन्याची पोत लंपास

चाळीसगावात महिलेच्या डोळ्यात मिरची पूड फेकून सोन्याची पोत लंपास

​राखुंडेनगर परिसरातील धक्कादायक घटना; १ लाख २० हजारांचा ऐवज लुटून भामटा फरार

​चाळीसगाव | प्रतिनिधी
शहरातील मालेगाव रोडवरील राखुंडेनगर परिसरात एका अज्ञात दुचाकीस्वाराने महिलेच्या डोळ्यात मिरचीची पूड फेकून त्यांच्या गळ्यातील सोन्याची पोत हिसकावून नेल्याची खळबळजनक घटना घडली आहे. या धाडसी चोरीमुळे परिसरात प्रचंड दहशत निर्माण झाली असून, चाळीसगाव शहर पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.
​मिळालेल्या माहितीनुसार, राखुंडेनगरमधील रहिवासी असलेल्या महिला शुक्रवारी (दि. १३) रात्री ९ वाजेच्या सुमारास नेहमीप्रमाणे घरातील काम उरकून बाहेर पाणी टाकण्यासाठी गेल्या होत्या. त्या पुन्हा घराकडे वळत असतानाच समोरून एक अज्ञात तरुण दुचाकीवरून वेगाने आला. काही समजण्याच्या आतच त्या भामट्याने महिलेच्या डोळ्यात मिरचीची पूड फेकली. डोळ्यांची आग होत असतानाच त्याने त्यांच्या गळ्यावर झडप घालून सुमारे १ लाख २० हजार रुपये किमतीची सोन्याची पोत बळजबरीने तोडली आणि मालेगावच्या दिशेने दुचाकीवरून सुसाट पळ काढला.
​महिलांमध्ये भीतीचे वातावरण
​महिलेस झालेल्या वेदनांमुळे त्यांनी आरडाओरड केली, मात्र तोपर्यंत चोरटा अंधाराचा फायदा घेऊन पसार झाला होता. घटनेची माहिती मिळताच परिसरात नागरिकांनी गर्दी केली. शहरात गेल्या काही दिवसांपासून दुचाकीवरून येऊन दागिने लंपास करण्याच्या घटनांमध्ये वाढ झाली आहे. यापूर्वीही पोलीस असल्याचे भासवून वृद्धांना लुटण्याचे प्रकार घडले होते. आता थेट डोळ्यात मिरची पूड फेकून लुटालूट सुरू झाल्याने महिलांमध्ये सुरक्षेचा प्रश्न ऐरणीवर आला आहे.
​पोलिसांकडून तपास सुरू
​या प्रकरणी चाळीसगाव शहर पोलिसांनी भारतीय न्याय संहितेच्या संबंधित कलमान्वये गुन्हा नोंदवला आहे. पोलिसांनी परिसरातील सीसीटीव्ही फुटेज तपासण्यास सुरुवात केली असून, आरोपीच्या वर्णनावरून त्याचा शोध घेतला जात आहे. रात्रीच्या वेळी अशा घटना घडत असल्याने पोलिसांनी गस्त वाढवावी आणि या सराईत भामट्याचा तातडीने बंदोबस्त करावा, अशी मागणी राखुंडेनगरमधील नागरिकांनी केली आहे.